आज देशका विभिन्न क्षेत्रमा वर्षा, मेघगर्जन, चट्याङ र हुरीबतासको सम्भावना रहेको छ भने केही प्रदेशमा अत्यधिक गर्मी र तातो लहरको जोखिम पनि देखिएको छ । जल तथा मौसम विज्ञान विभागअन्तर्गत मौसम पूर्वानुमान महाशाखाले पश्चिमी वायु, स्थानीय वायु तथा देशको पूर्वी भूभाग नजिक रहेको न्यून चापीय क्षेत्रको प्रभावका कारण मौसम मिश्रित रहने जनाएको हो ।

महाशाखाले आइतबार बिहान जारी गरेको मौसम बुलेटिनअनुसार कोसी, बागमती र गण्डकी प्रदेशमा दिनभर सामान्यदेखि आंशिक बदली रहनेछ । मधेस प्रदेशसहित अन्य प्रदेशका पहाडी तथा हिमाली भूभागमा आंशिक बदली रहने अनुमान गरिएको छ भने अधिकांश तराई क्षेत्रमा मौसम मुख्यतया सफा रहने बताइएको छ ।

दिउँसोपछि भने कोसी प्रदेशका केही स्थानसहित बागमती र गण्डकी प्रदेशका पहाडी तथा हिमाली भूभागमा मेघगर्जन र चट्याङसहित मध्यम वर्षा हुने सम्भावना रहेको मौसमविद्ले बताएका छन् । मधेस प्रदेशका केही तराई क्षेत्र, बागमती र गण्डकीका तराई भूभाग तथा लुम्बिनी, कर्णाली र सुदूरपश्चिम प्रदेशका पहाडी तथा हिमाली क्षेत्रमा पनि हल्कादेखि मध्यम वर्षाको सम्भावना रहेको छ । उच्च हिमाली क्षेत्रमा हल्का हिमपात हुन सक्ने अनुमान गरिएको छ ।

मौसम महाशाखाका अनुसार मधेस र कोसी प्रदेशका केही तराई क्षेत्रमा हुरी चल्ने सम्भावना पनि रहेको छ । विशेषगरी अपराह्नपछि हावाहुरीको जोखिम बढ्न सक्ने भएकाले सतर्कता अपनाउन आग्रह गरिएको छ । यस्तै सुदूरपश्चिम र लुम्बिनी प्रदेशका पहाडी क्षेत्रमा तातो दिन तथा तराई क्षेत्रमा तातो लहरको सम्भावना रहेको विभागले जनाएको छ ।

काठमाडौँ उपत्यकामा पनि आज साँझपख वर्षाको सम्भावना रहेको छ ।

उनका अनुसार दिनभर घाम र बादल दुवै देखिने भए पनि अपराह्नपछि मौसम परिवर्तन हुने संकेत देखिएको छ । मौसमविद्हरूले चट्याङ र हावाहुरीको समयमा खुला ठाउँमा नबस्न, आवश्यक सतर्कता अपनाउन तथा यात्रा गर्दा मौसमको अवस्थाबारे जानकारी लिएर मात्रै निस्किन आग्रह गरेका छन् ।

मौसम महाशाखाले रातिको समयमा पनि कोसी, बागमती र गण्डकी प्रदेशका केही पहाडी तथा हिमाली क्षेत्रमा वर्षाको सम्भावना कायम रहने जनाएको छ । मधेस, लुम्बिनी र कर्णाली प्रदेशका हिमाली क्षेत्रमा समेत मेघगर्जनसहित पानी पर्ने सम्भावना रहेको छ ।

विभागले तातो लहर प्रभावित क्षेत्रका नागरिकलाई दिउँसोको समयमा अत्यधिक घाममा बाहिर ननिस्किन, प्रशस्त पानी पिउन र स्वास्थ्यमा समस्या देखिए तुरुन्त चिकित्सकको सल्लाह लिन पनि आग्रह गरेको छ ।