प्रतिनिधिसभा बैठक सहज रूपमा सञ्चालन गर्ने विषयमा सत्ता र विपक्षी दलका प्रमुख सचेतकबीच छलफल भएको छ। छलफलपछि रास्वपाका प्रमुख सचेतक कविन्द्र बुर्लाकोटी सभामुख भेट्न पुगेका छन्।

सिंहदरबारस्थित रास्वपा संसदीय दलको कार्यालयमा रास्वपाका मुख्य सचेतक बुर्लाकोटी र विपक्षी दलका प्रमुख सचेतकहरूबीच छलफल भएको नेकपाका प्रमुख सचेतक युवराज दुलालले जानकारी दिए।

दुलालका अनुसार छलफलमा विपक्षी दलहरूले प्रधानमन्त्री बालेन्द्र शाह (बालेन) ले संसद्‌मा दिएको विवादित अभिव्यक्ति सच्याउनुपर्ने र उक्त भनाइलाई संसद्को रेकर्डबाट हटाउनुपर्ने माग राखेका छन्।

उनले भने, “प्रधानमन्त्रीले आएर आफ्नै अभिव्यक्ति सच्याउनुपर्छ र रेकर्डबाट हटाउनुपर्छ भन्ने हाम्रो माग हो। यो केवल राजनीतिक विषय होइन, गम्भीर राष्ट्रिय विषय हो।”

विपक्षी दलहरूले प्रधानमन्त्रीले आफ्नो भनाइ सच्याए र गल्ती स्वीकारेमा समस्या समाधान हुन सक्ने तर त्यसो नभए संसद् बैठक अवरुद्ध गर्ने अडान कायमै राखेका छन्।

छलफलपछि रास्वपा प्रमुख सचेतक कविन्द्र बुर्लाकोटी सभामुख डीपी अर्यालसँग भेट गर्न पुगेका छन्। संसद् सञ्चालन सहज बनाउन र राजनीतिक तनाव कम गर्ने विषयमा थप छलफल हुने अपेक्षा गरिएको छ।