राष्ट्रिय जेनजी नागरिक अभियानले पूर्वगृहमन्त्री तथा वर्तमान सांसद सुधन गुरुङमाथि प्रहरी हिरासतमै पुगेर आफ्ना अगुवाहरूमाथि दुर्व्यवहार गरेको आरोप लगाएको छ। अभियानले घटनाको निष्पक्ष छानबिन गरी दोषीमाथि कारबाही गर्न माग गरेको छ।
बिहीबार अभियानका संयोजक सुनिल सिंह र सहसंयोजक अजय सोडारीले संयुक्त प्रेस विज्ञप्ति जारी गर्दै उक्त आरोप सार्वजनिक गरेका हुन्।
प्रधानमन्त्री वालेन्द्र शाहले प्रतिनिधिसभामा नेपालले पनि भारतको भूमि मिचेको भन्ने अभिव्यक्ति दिएको विरोधमा भारतीय दूतावास अगाडि प्रदर्शन गर्ने क्रममा जेनजी अभियानका अजय सोडारी, प्रकाश बम, सुजन पौडेल र स्तुल जेम्स नेपालीलाई प्रहरीले नियन्त्रणमा लिएको थियो।
उनीहरूलाई काठमाडौंको सोह्रखुट्टेस्थित प्रहरी वृत्त लैनचौरको हिरासतमा राखिएको थियो। विज्ञप्तिअनुसार नियन्त्रणमा लिएको करिब एक घण्टापछि पूर्वगृहमन्त्री गुरुङ हिरासत कक्षमा पुगेका थिए।
अभियानले जारी गरेको विज्ञप्तिमा गुरुङले अस्वाभाविक, अमर्यादित तथा दबाबमूलक व्यवहार गरेको आरोप लगाइएको छ। उनीहरूले ‘तपाईंहरू कोबाट परिचालित हुनुहुन्छ’, ‘यो अन्तिम मौका हो’, ‘अब सरकार र प्रहरीले समाते भने छोड्दैनौँ’ र ‘सरकारविरुद्ध बोल्न बन्द गर्नुहोस्’ जस्ता अभिव्यक्ति प्रयोग गर्दै मानसिक दबाब सिर्जना गर्ने प्रयास गरिएको दाबी गरेका छन्।
जेनजी अभियानले हिरासतमा रहँदा प्रहरीबाट पनि उचित व्यवहार नभएको गुनासो गरेको छ। हिरासतमा राखिएका व्यक्तिलाई पिउने पानीसमेत उपलब्ध नगराइएको आरोप विज्ञप्तिमा उल्लेख छ।
अभियानले सम्पूर्ण घटनाको स्वतन्त्र छानबिन गरी जिम्मेवार व्यक्ति तथा निकायमाथि आवश्यक कारबाही गर्न सम्बन्धित निकायसँग माग गरेको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
