फिफा विश्वकपअन्तर्गत आज सम्पन्न समूह ‘इ’ को खेलमा कुरासाओ र इक्वेडर गोलरहित बराबरीमा रोकिएका छन्।

अमेरिकाको कान्सास सिटीस्थित बाउन्ड्रिङ रंगशालामा भएको प्रतिस्पर्धात्मक खेलमा दुवै टोलीले निर्धारित समयमा गोल गर्न सकेनन्। खेलभर गोलका अवसर सिर्जना भए पनि कुनै पनि टोलीले त्यसलाई गोलमा परिणत गर्न सकेन।

इक्वेडरले खेलमा दबाब बनाएर आक्रमण जारी राखे पनि कुरासाओका गोलकिपर एलोय रुम उत्कृष्ट प्रदर्शन गर्दै टोलीका लागि संकटमोचक बने। उनले खेलभर १५ वटा महत्वपूर्ण सेभ गर्दै विपक्षी टोलीलाई गोल गर्नबाट रोके।

रुमको शानदार प्रदर्शनकै कारण कुरासाओले विश्वकपमा आफ्नो पहिलो अंक जोड्न सफल भएको हो। लगातार आक्रमणको सामना गर्दा पनि उनले गोलपोस्ट सुरक्षित राखेपछि खेल बराबरीमा सकिएको थियो।

बराबरीसँगै दुवै टोलीले एक–एक अंक बाँडेका छन्। विशेषगरी कुरासाओका लागि यो नतिजा महत्वपूर्ण मानिएको छ, किनभने टोलीले विश्वकप इतिहासमा पहिलो पटक अंक जोड्न सफल भएको हो।

समूह ‘इ’ को आगामी खेलमा दुवै टोली नकआउट चरणको सम्भावना बलियो बनाउन जितको खोजीमा मैदान उत्रनेछन्।