काठमाडौँ — नेपाली कांग्रेसका केन्द्रीय सदस्य अर्जुननरसिंह केसीले पार्टीभित्रको अनुशासनहीनता, गुटबन्दी र नेतृत्वको गैरजिम्मेवारीपनप्रति कडा असन्तोष जनाउँदै आफू आमरण अनशन बस्नेसम्मको चेतावनी दिएका छन्।
कांग्रेस केन्द्रीय समिति बैठकमा बोल्दै नेता केसीले अहिले जनतामाझ पुराना राजनीतिक दलप्रति भरोसा हराउँदै गएको र नेपाली कांग्रेसले पनि सुधार नगरे गम्भीर संकट आउन सक्ने चेतावनी दिए।
“विगत केही वर्षदेखि राजनीतिक दलप्रति जनताको विश्वास कमजोर हुँदै गएको छ। पुराना पार्टीहरूले काम गर्दैनन् भन्ने सन्देश जनतामाझ फैलिसकेको छ,” उनले भने, “अब पनि गम्भीर भएर नसोच्ने हो भने परिस्थिति भयावह हुन सक्छ।”
उनले पार्टीभित्र बढ्दो गुटउपगुटको आलोचना गर्दै भने, “पार्टी व्यक्ति प्रधान होइन, संस्था प्रधान हुनुपर्छ। अहिले भने व्यक्तिको वरिपरि राजनीति घुमिरहेको छ। कसैलाई पेल्ने र कसैलाई बचाउने प्रवृत्तिले पार्टीलाई गलाइरहेको छ।”
केसीले पार्टीको अनुशासन समितिको कार्यशैलीप्रति पनि असन्तुष्टि जनाउँदै निष्पक्षता र पारदर्शिताको माग गरे। उनले भने, “अनुशासन समितिले संविधानभन्दा माथि भएर काम गर्न मिल्दैन। यदि यसरी नै एक पक्षले अर्को पक्षलाई मनपरी ढंगले दबाउन खोज्यो भने, मैले आफैँ आमरण अनशन बस्नुपर्ने हुन्छ। यसको सम्पूर्ण जिम्मेवारी सभापतिले लिनुपर्छ।”
उनले नेपाली कांग्रेसको आगामी महाधिवेशन समयमै सम्पन्न गर्नुपर्ने माग गर्दै २०८२ मै महाधिवेशन हुनुपर्ने धारणा राखे। “अब मिति तय नगरी बस्ने अवस्था छैन। समय थप्ने हो भने थपेर पनि २०८२ मै महाधिवेशन गर्ने निर्णय गर्नुपर्छ,” उनले स्पष्ट पारे।
नेता केसीको यस कडा धारणा र अनशनको चेतावनीले नेपाली कांग्रेसको आन्तरिक राजनीति फेरि तातिएको छ। उनका अभिव्यक्तिले पार्टीभित्रको असन्तोष सतहमा आएको संकेत गर्छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
