त्रिभुवन विश्वविद्यालय (त्रिवि)ले आफ्ना सबै आंगिक क्याम्पसलाई स्वतन्त्र विद्यार्थी युनियन (स्ववियु)का संरचना हटाउन निर्देशन दिएको छ।

विद्यार्थी कल्याण तथा खेलकुद निर्देशनालयले सोमबार मातहतका सबै आंगिक क्याम्पसमा पत्र पठाउँदै ६० दिनभित्र दलीय विद्यार्थी संगठनका संरचना हटाउन निर्देशन दिएको हो।

निर्देशनालयका उप–प्रशिक्षक सन्देशकुमार रेग्मीको हस्ताक्षर रहेको पत्रमा स्ववियुको स्थानमा ‘स्टुडेन्ट काउन्सिल’ वा ‘भ्वाइस अफ स्टुडेन्ट’ गठन गर्न पनि भनिएको छ।

त्रिविले ९० दिनभित्र ‘स्टुडेन्ट काउन्सिल’ गठन गरी त्यसको जानकारी विद्यार्थी कल्याण तथा खेलकुद निर्देशनालयमा पठाउन क्याम्पसहरूलाई निर्देशन दिएको छ।

निर्देशनालयले विश्वविद्यालय अनुदान आयोग र शिक्षा तथा खेलकुद मन्त्रालयको पत्रअनुसार यो निर्णय कार्यान्वयन गर्न भनिएको जनाएको छ।

पत्रमा शिक्षा क्षेत्रमा दलीय हस्तक्षेप बढ्दै गएको, विद्यार्थीको वास्तविक आवाज प्रभावकारी रूपमा नसमेटिएको तथा शैक्षिक गुणस्तरमा असर परेको उल्लेख गर्दै ६० दिनभित्र विद्यालय तथा विश्वविद्यालय परिसरबाट दलीय विद्यार्थी संगठनका संरचना हटाई ९० दिनभित्र ‘स्टुडेन्ट काउन्सिल’ वा ‘भ्वाइस अफ स्टुडेन्ट’ संयन्त्र विकास गर्न अनुरोध गरिएको छ।