काठमाडौं महानगरपालिकाको कार्यपालिका बैठक आज बस्दैछ। दिउँसो २ बजेका लागि बैठक बोलाइएको महानगर स्रोतले जानकारी दिएको छ। यो बैठक लामो समयपछि बस्न लागेको हो।
महानगरपालिकाको कार्यपालिका बैठक नियमित रूपमा नबसेको भन्दै विगतमा आलोचना हुँदै आएको थियो। यसैबीच, गत जेठ १२ गते महानगरका ४१ कार्यपालिका सदस्यले मेयर बालेन शाहलाई पत्र लेख्दै बैठक बोलाउन आग्रह गरेका थिए। त्यसको दुई महिनापछि कार्यपालिका बैठक बस्न लागेको हो।
आजको कार्यसूची अनुसार बिहान ११ बजे मेयर बालेन शाहको संयोजकत्वमा स्रोत अनुमान तथा बजेट निर्धारण समितिको बैठक हुनेछ। त्यसपछि उपप्रमुख सुनिता डंगोल नेतृत्वको बजेट तथा कार्यक्रम तर्जुमा समितिको बैठक बस्नेछ।
दिउँसोको कार्यपालिका बैठकले नीति तथा कार्यक्रम र आगामी आर्थिक वर्षको बजेट नगर सभामा पेस गर्ने तयारी गरेको छ। त्यससँगै कार्यपालिकाले नगर सभाको मिति पनि तोक्ने छ।
नयाँ बजेट र कार्ययोजना सार्वजनिक हुने तयारीमा रहेको महानगरपालिकाको यो बैठक आगामी वर्षको योजना र प्राथमिकताको दिशानिर्देशक बन्ने अपेक्षा गरिएको छ।
