भारतको उत्तराखण्डस्थित उत्तरकाशीको हर्षिल क्षेत्रमा साउन २० गते परेको भीषण वर्षापछि आएको बाढीमा जाजरकोटको कुशे गाउँपालिका–२ का १३ जना नेपाली नागरिक हराएको आशंका गरिएको छ। उनीहरू अन्य केही व्यक्तिहरूसँग सम्पर्कविहीन छन्।
कुशे गाउँपालिकाले बिहीबार एक विज्ञप्ति जारी गर्दै सो वडासँगै अन्य वडाका केही व्यक्ति पनि बाढीपछि सम्पर्कविहीन रहेको जानकारी दिएको छ। प्रारम्भिक सूचना अनुसार उनीहरू सबै मजदुरीका लागि हर्षिल क्षेत्र गएका थिए।
गाउँपालिका अध्यक्ष हरिचन्द्र बस्नेतले जारी गरेको विज्ञप्तिमा हराएकाहरूको खोजी तथा उद्धार कार्यलाई छिटो र प्रभावकारी बनाउन आग्रह गर्दै नेपाल सरकार र परराष्ट्र मन्त्रालयमार्फत कूटनीतिक पहल गर्न संघीय र प्रदेश सरकारको ध्यानाकर्षण गराइएको छ।
यसैबीच, बर्दिया जिल्लाका पनि चार जना नेपाली सम्पर्कविहीन भएको सूचना सामाजिक सञ्जालमार्फत आएको छ। उनीहरू पनि सोही क्षेत्रमा काम गर्न गएका हुनसक्ने र बाढीमा परेका हुनसक्ने आशंका गरिएको छ।
हाल भारतको उत्तराखण्ड राज्यमा भारी वर्षाका कारण जनजीवन प्रभावित बनेको छ। नेपाल सरकार र सम्बन्धित निकायबाट उद्धार र खोजी कार्यमा पहल भइहरको छ। हराएकाहरूको सकुशल फेला पारियोस् भन्ने कामना गरिएको छ।
