नेपाली सेनाले काठमाडौं उपत्यकामा दिउँसोको समयमा लागू भएको कर्फ्यु हटाएको छ । सेनाले दिएको जानकारीअनुसार अब कर्फ्यु आज बेलुकी ७ बजेदेखि भदौ २८ गते बिहान ६ बजेसम्म मात्र लागु हुनेछ ।
यससँगै आज बिहान ११ बजेदेखि साँझ ५ बजेसम्म निषेधाज्ञा जारी गरिएको छ । बिहान ११ बजेसम्म भने निषेधाज्ञा पनि हटाइएको थियो ।
जेन जेड आन्दोलनको क्रममा हिंसात्मक घटना भएपछि उपत्यकामा कडा सुरक्षा व्यवस्था लागू गरिएको हो । तर क्रमशः कर्फ्यु र निषेधाज्ञा खुकुलो बनाएसँगै जनजीवन सामान्यतर्फ उन्मुख भएको छ । अघिल्ला दिनको तुलनामा आज सडकमा सवारीसाधनको संख्या बढेको देखिएको छ ।
सामाजिक सञ्जाल प्रतिबन्ध र भ्रष्टाचारविरुद्ध भदौ २३ गते प्रदर्शन हिंसात्मक भएपछि २४ गते राति १० बजेदेखि सेनाले सुरक्षा कमाण्ड सम्हालेको थियो । सुरुमा देशव्यापी कर्फ्यु आदेश जारी गरिएको भए पनि अहिले काठमाडौं उपत्यकामा मात्र सीमित गरिएको छ ।
सुरक्षा निकायका अनुसार कर्फ्यु आदेश हिँडडुल तथा सम्पूर्ण आवतजावत रोक्ने कडा नियम हो भने निषेधाज्ञा भिडभाड रोक्न लगाइने उपाय हो ।
प्रतिक्रिया
सम्बन्धित खवर
