मलेसिया सरकारले वैदेशिक रोजगार व्यवसायीका लागि लागू गरेको नयाँ मापदण्डबारे प्रधानमन्त्री सुशीला कार्कीले गम्भीर चासो देखाएकी छन्। बिहीबार बिहान उनले श्रम मन्त्रालयका सचिव कृष्णहरि पुष्करलाई बोलाएर उक्त मापदण्डले नेपाली कामदार र व्यवसायीमा पार्न सक्ने प्रभावबारे विस्तृत जानकारी लिइन्।
प्रधानमन्त्रीले सम्भावित असर न्युनिकरणका लागि तत्काल गृहकार्य गर्न र परराष्ट्र, अर्थ तथा श्रम मन्त्रालयसँग समन्वय गर्न निर्देशन दिएकी छन्।
सचिव पुष्करका अनुसार मलेसियाले जारी गरेको नयाँ मापदण्ड कूटनीतिक तहमै सम्बोधन गर्नुपर्ने खालको विषय हो। उनले नेपालका रोजगार व्यवसायी र कामदारको हितलाई ध्यानमा राख्दै छलफल र पहल अघि बढाइने बताए।
नेपालमा करिब १२०० वैदेशिक रोजगार व्यवसायी दर्ता छन्, जसमा ९०० भन्दा बढी मलेसियामै आश्रित छन्। नयाँ मापदण्डले करिब एक दर्जन ठूला कम्पनी मात्र योग्य बन्ने सम्भावना देखिएको छ, जसका कारण साना व्यवसायी र कामदारमा अन्योल बढेको छ।
मलेसिया लामो समयदेखि नेपाली कामदारका लागि प्रमुख रोजगारी गन्तव्य रहँदै आएको छ। नयाँ नियमले त्यहाँ रोजगारीमा जान चाहने हजारौं नेपाली प्रभावित हुने अनुमान गरिएको छ।
