नेपाली कांग्रेसको केन्द्रीय कार्यसमिति बैठक आज दिउँसो १ बजे पार्टी केन्द्रीय कार्यालय बीपी स्मृति भवन, ललितपुरमा बस्दैछ। बैठकले पार्टीको आगामी महाधिवेशनबारे महत्वपूर्ण निर्णय लिने अपेक्षा गरिएको छ।
असोज २८ गतेदेखि सुरु भएको बैठकमा ‘जेन–जी’ आन्दोलनपछि बनेको अन्तरिम सरकार, प्रतिनिधिसभा विघटन र बदलिँदो राजनीतिक परिस्थिति सन्दर्भमा कांग्रेसको भूमिकाबारे छलफल हुँदै आएको छ।
आजको बैठकको मुख्य एजेन्डा भने १५औँ महाधिवेशन नियमित गर्ने वा विशेष महाधिवेशनमार्फत नेतृत्व चयन गर्ने भन्ने विषयमा केन्द्रित हुनेछ। सभापति शेरबहादुर देउवा नेतृत्वको वर्तमान कार्यसमितिको कार्यकाल मंसिरभित्र समाप्त हुँदैछ, जसका कारण पार्टीभित्र महाधिवेशनको स्वरूपबारे मतभेद बढेका छन्।
विशेष महाधिवेशनको पक्षमा रहेका नेताहरूले महाधिवेशन प्रतिनिधिबीच हस्ताक्षर अभियान सञ्चालन गरेका थिए, जसमा करिब ५४ प्रतिशत प्रतिनिधिको समर्थन प्राप्त भएको बताइन्छ।
सभापति देउवाको स्वास्थ्य अवस्था कमजोर भएपछि उपसभापति पूर्णबहादुर खड्का कार्यवाहक सभापतिको भूमिकामा बैठक सञ्चालन गर्दै आएका छन्। तिहार र छठ पर्वका कारण स्थगित बैठक आज पुनः जारी हुँदैछ।
पार्टी स्रोतका अनुसार आजको बैठकले आगामी महाधिवेशनको स्वरूप र मिति टुंग्याउने सम्भावना रहेको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
