कानुन, न्याय तथा संसदीय मामिला मन्त्री अनिलकुमार सिन्हाले राजनीतिक दलहरूलाई आगामी प्रतिनिधिसभा निर्वाचनप्रति अनावश्यक डर देखाउनु नपर्ने बताएका छन्। उनले पाँच सय बन्दुक बाहिर भएकै कारण चुनावमा जान डराएको भन्ने कुरामा आश्चर्य व्यक्त गरे।
नेपाल कानुन समाजले काठमाडौंमा आयोजना गरेको ‘प्रतिनिधि सभा निर्वाचनः चुनौती र अवसर’ विषयक अन्तरक्रिया कार्यक्रममा बोल्दै मन्त्री सिन्हाले फागुन २१ गते हुने निर्वाचनको वातावरण सरकारले तयार गरिसकेको बताए।
उनले भने, “तपाईँहरूले ५२ सालको जनयुद्धको वातावरण फेस गर्नुभयो। जुनसुकै बेला गोली चल्थ्यो। आजको अवस्था त्यसको तुलनामा धेरै सुरक्षित छ।”
मन्त्री सिन्हाले अहिले राति पनि मानिसहरू निडर रूपमा हिँडडुल गर्न सक्ने अवस्था रहेको उल्लेख गरे। उनले थपे, “यदि आजका दलहरू पाँच सय बन्दुक बाहिर छ भनेर डराइरहेका छन् भने त्यो असम्भव लाग्छ। यो केवल केहीको व्यक्तिगत धारणा हुन सक्छ।”
उनले सबै राजनीतिक दल र स्वतन्त्र उम्मेदवारहरूले चुनावको वातावरण बनाउन ध्यान दिनुपर्नेमा जोड दिए।
