प्रगतिशील राष्ट्रिय अभियानका अगुवा सुदन किराँतीले अबको निर्वाचनमा देशलाई अस्तव्यस्त बनाउने नैतिकताहीन र अहंकारी नेताहरूलाई जनताले जरैदेखि उखेल्ने चेतावनी दिएका छन्।
विहीबार काठमाडौंमा आयोजित पत्रकार सम्मेलनमा बोल्दै किराँतीले देशलाई भ्रष्टाचार, बेथिति र अहंकारको दलदलमा फसाउने नेताहरूलाई आगामी निर्वाचनले राजनीतिक रूपमा समाप्त पार्ने समय आएको बताए। उनका अनुसार अब जनता नै यो देशको सफाई अभियानमा उत्रिनेछन्।
उनले युवा आन्दोलनको समयमा हेलिकोप्टरमा भागेका र सैनिक ब्यारेकमा लुकेका असफल नेताहरूमा आजसम्म कुनै रुपान्तरण नदेखिएको टिप्पणी गरे। किराँतीले भने, “त्यो पुस्ताले जनताको बलिदान बिर्सियो, सत्ता र स्वार्थमा मात्रै रमायो।”
किराँतीले आफूहरूले माओवादी केन्द्रभित्रै लोकतान्त्रिक मूल्य, पारदर्शिता, सम्पत्ति छानबिन र नेतृत्व हस्तान्तरणको एजेन्डा उठाए पनि पार्टी नेतृत्वले बारम्बार त्यसलाई बेवास्ता गरेको आरोप लगाए। उनले भने, “हामीले तीन वर्षदेखि पार्टीभित्र लोकतान्त्रिक अभ्यास र जवाफदेहिताको माग उठायौं, तर महाधिवेशनका मितिहरू बारम्बार तोकिएर पनि तोडियो। यो नै परिवर्तनविरोधी मानसिकताको प्रमाण हो।”
किराँतीले अन्त्यमा देश र पार्टी दुवैमा नयाँ पुस्ताको नेतृत्व स्थापना र शुद्धिकरणको लडाइँ जारी रहने चेतावनी दिए।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
