नेपाल राष्ट्र बैंकले सार्वजनिक गरेको नवीनतम तथ्यांकले देशको बाह्य क्षेत्रीय स्थिति गत वर्षभन्दा अझै बलियो बनेको देखाएको छ। चालु खाता र शोधनान्तर दुवै उच्च बचतमा पुगेका छन्, यद्यपि प्रत्यक्ष वैदेशिक लगानी (एफडीआई) भने उल्लेख्य रूपमा घटेको छ।
राष्ट्र बैंकका अनुसार चालु खाता यस समीक्षा अवधिमा २ खर्ब ३७ अर्ब ५९ करोड रुपैंयाँ बचतमा पुगेको छ। गत वर्ष सोही अवधिमा चालु खाता बचत १ खर्ब १५ अर्ब ३६ करोड मात्रै थियो। अमेरिकी डलरमा हेर्दा चालु खाताको बचत ८६ करोड डलरबाट उक्लेर १ अर्ब ६९ करोड डलरमा पुगेको छ।
समीक्षा अवधिमा पुँजीगत ट्रान्सफर पनि उल्लेखनीय रूपमा बढेको छ। यस वर्ष ५ अर्ब ५५ करोड पुँजीगत ट्रान्सफर आएको छ, जुन गत वर्षका २ अर्ब भन्दा धेरै गुणा बढी हो।
तर, प्रत्यक्ष वैदेशिक लगानीको अवस्था विपरित देखिएको छ। यस वर्ष एफडीआई घटेर १ अर्ब ७४ करोडमा सीमित भएको छ, जबकि गत वर्ष ४ अर्ब ८१ करोड रहेको थियो।
यद्यपि वैदेशिक लगानी घटे पनि समग्र शोधनान्तर स्थिति अझ बलियो बनेको राष्ट्र बैंकले जनाएको छ। शोधनान्तर यस वर्ष २ खर्ब ६४ अर्ब ३ करोड बचतमा पुगेको छ, जुन गत वर्षको १ खर्ब ८४ अर्ब ९९ करोडभन्दा धेरै हो। डलरमा समेत यो १ अर्ब ३८ करोडबाट बढेर १ अर्ब ८८ करोड पुगेको छ।
सामान्यतया बाह्य क्षेत्रका सूचकहरू मजबूत हुनु देशको आयात–निर्यात, रेमिटेन्स तथा पुँजी प्रवाहमा सकारात्मक प्रभावको संकेत मानिन्छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
