नेपाली कांग्रेसको केन्द्रीय कार्यसमिति बैठक आज दिउँसो १ बजे पार्टी केन्द्रीय कार्यालय सानेपामा बस्दैछ। मुख्यसचिव कृष्णप्रसाद पौडेलका अनुसार बैठकमा पदाधिकारी, केन्द्रीय सदस्य, आमन्त्रित सदस्य र सातै प्रदेशका सभापतिहरू सहभागी हुनेछन्।
यसअघि मंसिर ४ गतेका लागि बोलाइएको बैठक स्थगित भएको थियो। असोज २८ गतेदेखि जारी कार्यसमिति बैठकमा १५औँ महाधिवेशनको मिति राख्ने विषयमा मतभिन्नता बढेपछि बैठक पटक–पटक रोकिँदै आएको हो।
आजको बैठक मुख्यतः सहमतिको आधार खोज्ने उद्देश्यले बोलाइएको हो। केन्द्रीय सदस्यहरूले धारणा राखिसके पनि अनौपचारिक छलफलमा समाधान ननिस्केपछि पुनः बसिरहेको कांग्रेस नेताहरू बताउँछन्।
महामन्त्री गगन थापा, विश्वप्रकाश शर्मा लगायत नेताहरूले आगामी फागुन २१ गते हुने प्रतिनिधिसभा उपनिर्वाचनभन्दा अघि, पुसभित्रै, महाधिवेशन सकिनुपर्ने माग गर्दै आएका छन्। तर सभापति शेरबहादुर देउवा पक्ष भने निर्वाचनपछि मात्रै महाधिवेशन गर्नुपर्ने अडानमा कडा रूपमा उभिएको छ।
आजको बैठकले दुवै धारबीचको दूरी घटाएर महाधिवेशन मिति टुंग्याउने अपेक्षा गरिएको छ।
