नेपाली कांग्रेसमा विशेष महाधिवेशनको माग राख्ने नेताहरूले सोमबार राष्ट्रपति रामचन्द्र पौडेलसँग शीतलनिवासमा भेटवार्ता गरेका छन्। लुम्बिनी प्रदेश अध्यक्ष अम्मर पुन, नेता गुरुराज घिमिरेसहित करिब दुई दर्जन नेता उक्त भेटमा सहभागी थिए।
भेटमा जेन९जी आन्दोलनपछिको राजनीतिक परिस्थिती, फागुन २१ मा तय भएको निर्वाचन र कांग्रेसभित्रको बढ्दो विवादबारे छलफल भएको नेता घिमिरेले जानकारी दिए। उनले बताएअनुसार राष्ट्रपति पौडेलले अहिलेको परिस्थिति निकाल्न ‘निर्वाचन नै निकास’ भएको धारणा व्यक्त गरेका छन्।
राष्ट्रपतिले पार्टीभित्रको विवादबारे प्रत्यक्ष बोल्न असमर्थता व्यक्त गर्दै नेताहरूलाई मिलेर अघि बढ्न सुझाव दिएका छन्। उनका शब्दमा, “पार्टीभित्रको कुरा म भन्न मिल्दैन, तर विभाजनले कसैलाई फाइदा हुँदैन। मिलेर अघि बढ्नुस्।”
त्यस्तै राष्ट्रपति पौडेलले कांग्रेसमात्र नभई अन्य राजनीतिक दलहरूसँग सहकार्य गर्दै स्थिर चुनावी वातावरण बनाउनु आवश्यक रहेको पनि जोड दिए।
समग्रमा भेटवार्ताले पार्टी एकता र देशको शान्ति सन्देश प्रवाह गर्ने प्रयास स्वरूप देखिएको छ।
