नेपाल प्रिमियर लिग (एनपीएल) सिजन–२ अन्तर्गत टीयू क्रिकेट मैदानमा भइरहेको महत्वपूर्ण खेलमा चितवन राइनोजले टस जित्दै जनकपुर बोल्ट्सलाई बलिङ गर्न पठाएको छ। कप्तान कुशल मल्लले टस जितेपछि पहिला रन खडा गर्ने योजनासहित ब्याटिङ रोजेका हुन्।
लगातार निराशाजनक प्रदर्शन गर्दै आएको साविक विजेता जनकपुर बोल्ट्स अहिले पनि जितविहीन अवस्थामै छन् र अंक तालिकाको पुछारमा रहेका छन्। प्लेअफबाट लगभग बाहिरिएको जनकपुरका लागि यो खेल प्रतिष्ठा जोगाउने अवसर मानिएको छ।
यता चितवन राइनोज चार खेलमा दुई जितसहित चौथो स्थानमा छ। प्लेअफको प्रतिस्पर्धा बलियो बनाउन चितवनले आजको खेललाई ‘अवसर’ का रूपमा लिएको बताइन्छ। कुशल मल्लको टोलीले सुरुआती ओभरमै राम्रो लय बटुल्दै उच्च स्कोर बनाउने लक्ष्य राखेको छ।
जनकपुरका कमजोर प्रदर्शन र चितवनको स्थिर अवस्थामा आजको भिडन्त दुवैका लागि महत्त्वपूर्ण बनाएको छ।
