अल जेन–जी मुभमेन्टले वर्तमान प्रधानमन्त्री सुशीला कार्कीले देशलाई राजनीतिक निकास दिन नसकेको आरोप लगाउँदै सर्वपक्षीय राष्ट्रिय सरकार गठनको माग गरेको छ । सोमबार काठमाडौंस्थित संवाद डबलीमा आयोजित पत्रकार सम्मेलनमार्फत मुभमेन्टले आइतबार गरेको शान्तिपूर्ण प्रदर्शनमा भएको प्रहरी धरपकडलाई गैरन्यायिक र गैरकानुनी भन्दै कडा आपत्ति जनाएको हो ।
पत्रकार सम्मेलनमा बोल्दै अल जेन–जी मुभमेन्टका मेग खत्रीले सिंहदरबारको दक्षिण गेटमा गरिएको शान्तिपूर्ण प्रदर्शनमाथि सुरक्षाकर्मीले हस्तक्षेप गरेको भन्दै आक्रोश व्यक्त गरे । “हामीले हिजो सिंहदरबारको दक्षिण गेटमा गरेको शान्तिपूर्ण प्रदर्शनमा गरिएको हस्तक्षेप गैरन्यायिक होइन र ?” भन्दै उनले सरकारको व्यवहारप्रति प्रश्न उठाए ।
मुभमेन्टका अर्का नेता हरिकृष्ण गजुरेलले वर्तमान सरकार पनि अघिल्ला सरकारकै शैलीमा अघि बढेको आरोप लगाए । ऐतिहासिक आन्दोलनको बलमा बनेको सरकारले भ्रष्टाचारविरुद्ध अपेक्षित कदम चाल्न नसकेको उनको भनाइ थियो । “सुशीला कार्की नेतृत्वको सरकारलाई हटाएर सर्वपक्षीय राष्ट्रिय सरकार बनाउनुको विकल्प छैन,” उनले स्पष्ट पारे ।
यसैगरी, माधव ठकुरीले जेन–जी आन्दोलनकै बलमा बनेको सरकार आन्दोलनका मागविपरीत अघि बढिरहेको भन्दै चिन्ता व्यक्त गरे । उनले सुशीला सरकार र मिराजबीचको द्वन्द्वले देशलाई झन् गहिरो संकटतर्फ धकेल्ने दाबी गरे ।
डा. शम्भू पोखरेलले शान्तिपूर्ण प्रदर्शनमा भएको धरपकड गैरकानुनी रहेको बताउँदै सरकारले सार्वजनिक रूपमा माफी माग्नुपर्ने माग गरे । जनक थापाले संविधानद्वारा प्रदत्त अधिकारहरू कुण्ठित हुँदै गए जेन–जी आन्दोलनभन्दा ठूलो विद्रोह हुने चेतावनी दिए ।
अशोक रानामगरले राष्ट्रिय मुक्ति र राजनीतिक निकासका लागि अल जेन–जी मुभमेन्टले नेतृत्व लिने दाबी गर्दै आन्दोलन अझ सशक्त बनाइने बताए ।
उल्लेखनीय छ, आइतबार सिंहदरबारको दक्षिण गेटमा भएको प्रदर्शनका क्रममा हरिकृष्ण गजुरेल, माधव ठकुरी, अशोक रानामगर र जनक थापालाई प्रहरीले नियन्त्रणमा लिई सिंहदरबार प्रहरी वृत्त, अनामनगरमा लगेको थियो ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
