शनिबारदेखि इजरायल र अमेरिकाले इरानमा थालेको आक्रमणपछि मध्यपूर्व क्षेत्रभरि मानवीय क्षति बढ्दै गएको छ। विभिन्न अन्तर्राष्ट्रिय सञ्चारमाध्यमका विवरणअनुसार हालसम्म कुल ६०६ जनाको मृत्यु भएको छ।
सबैभन्दा धेरै क्षति इरानमा भएको छ। इरानमा मात्रै ५५५ जनाको मृत्यु भएको पुष्टि गरिएको छ भने सयौँ घाइते भएका छन्। इरानका १३१ जिल्लामा आक्रमण भएको जनाइएको छ। इरान रेड क्रिसेन्ट सोसाइटीका अनुसार एक विद्यालयमा भएको आक्रमणमा ठूलो मानवीय क्षति भएको छ। दक्षिणपूर्वी सहर मिनाबमा प्राथमिक विद्यालयमा भएको आक्रमणमा धेरै बालबालिकाको ज्यान गएको छ। स्वास्थ्य मन्त्रालयका जनसम्पर्क प्रमुख होसेन केर्मानपुरका अनुसार करिब १८० बालिकाको मृत्यु भएको छ।
इजरायलमा १० जनाको मृत्यु भएको छ भने सयौँ घाइते भएका छन्। केन्द्रीय इजरायलको बेइत शेमेशमा इरानी मिसाइल आक्रमणमा ९ जनाको ज्यान गएको छ। तेल अवीव क्षेत्रमा एक महिलाको मृत्यु भएको पुष्टि गरिएको छ।
कुवेतमा इरानी आक्रमणमा तीन अमेरिकी सैनिकको मृत्यु भएको छ भने पाँच जना गम्भीर घाइते भएका छन्। केही सैनिक सामान्य घाइते भई उपचारपछि सेवामा फर्किने तयारीमा रहेका बताइएको छ।
बहराइनमा एक भारतीय कामदारको मृत्यु भएको छ भने चार जना घाइते भएका छन्।
इराकमा दुई जनाको मृत्यु भएको छ भने पाँच जना घाइते भएका छन्।
जोर्डनमा मानवीय क्षति भएको छैन। त्यहाँ ४९ ड्रोन र मिसाइल अवरोध गरिएको जनाइएको छ।
कुवेतमा एक जनाको मृत्यु भएको छ भने ३२ जना घाइते भएका छन्।
लेबनानमा ३१ जनाको मृत्यु र १४९ जना घाइते भएका छन्।
ओमानमा पाँच जना घाइते भएका छन्।
कतारमा १६ जना घाइते भएका छन्।
साउदी अरबमा हालसम्म मानवीय क्षति भएको छैन।
संयुक्त अरब इमिरेट्समा नेपाली कामदारसहित तीन जनाको मृत्यु भएको पुष्टि गरिएको छ भने ५८ जना घाइते भएका छन्। गोरखाका २९ वर्षीय एक नेपाली युवकले ज्यान गुमाएका छन्।
युद्धका कारण मध्यपूर्व क्षेत्रभरि मानवीय क्षति बढ्दै गएको छ र अवस्था अझ जटिल बन्दै गएको जनाइएको छ।
