बलात्कारपछि हत्या गरिएको भनिएकी सुर्खेतकी इनिशा विकलाई न्याय दिनुपर्ने माग गर्दै काठमाडौँ र सुर्खेतमा विद्यार्थीहरूले प्रदर्शन गरेका छन्।
इनिशा विक हत्या प्रकरणको निष्पक्ष छानबिन गरी दोषीलाई कडा कारबाही गर्न माग गर्दै विद्यार्थीहरू सडकमा उत्रिएका हुन्। इनिशालाई न्याय दिनुपर्ने भन्दै काठमाडौँमा पद्मकन्या बहुमुखी क्याम्पसको स्वतन्त्र विद्यार्थी युनियनले बागबजारदेखि माइतीघर मण्डलासम्म विरोध प्रदर्शन गरेको छ।
उता, इनिशा अध्ययनरत विद्यालय उषा बालवाटिकाका विद्यार्थी, शिक्षक र कर्मचारीहरूले पनि सुर्खेतको वीरेन्द्रनगरमा प्रदर्शन गरेका छन्।
विद्यालय पोशाकमै रहेका विद्यार्थीहरूले केही समय जिल्ला प्रहरी कार्यालयको गेट अगाडि नाराबाजी समेत गरेका थिए।
फागुन २३ गते इनिशा सुर्खेतको सामुदायिक जंगलमा मृत अवस्थामा फेला परेकी थिइन्। पोस्टमार्टम रिपोर्टमा बलात्कारपछि अत्यधिक रक्तस्रावका कारण उनको मृत्यु भएको देखिएपछि प्रहरीले घटनाबारे अनुसन्धान जारी राखेको छ।
अनुसन्धानका लागि प्रहरीको केन्द्रीय अनुसन्धान ब्युरो (सिआइबी)को टोली सुर्खेत पुगेर घटनाबारे थप अनुसन्धान थालेको छ।
घटनाको एक सातासम्म पनि इनिशाको शव आफन्तले बुझ्न मानेका छैनन्। हाल उनको शव कर्णाली प्रादेशिक अस्पतालको शवगृहमा राखिएको छ।
सामूहिक बलात्कारपछि हत्या गरिएको भन्दै दोषीलाई कारबाही हुने विश्वस्त वातावरण नभएसम्म शव नबुझ्ने अडान आफन्तले लिएका छन्। रोजगारीका लागि दुबईमा रहेका इनिशाका बुवा छोरीको हत्या भएको खबर पाएपछि दुबईबाट भारत हुँदै सुर्खेत पुगेका छन्।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
