सरकारले जेनजी आन्दोलनका क्रममा भदौ २४ गते भएको घटनाको छानबिन गर्न एक हप्ताभित्र उच्चस्तरीय छानबिन समिति गठन गर्ने निर्णय गरेको छ।

शनिबार साँझ सार्वजनिक गरिएको शासकीय सुधारसम्बन्धी कार्यसूचीमा उक्त निर्णय समावेश गरिएको हो। कार्यसूचीको बुँदा नम्बर ७ मा भदौ २४ गतेको घटनाको सत्यतथ्य पत्ता लगाउन उच्चस्तरीय समिति गठन गरिने उल्लेख छ।

सरकारले गठन गर्ने उक्त समितिलाई घटनासम्बन्धी सम्पूर्ण विवरण संकलन र विश्लेषण गर्ने जिम्मेवारी दिइने छ। साथै, घटनामा संलग्न वा जिम्मेवार पक्षको पहिचान गरी निश्चित समयसीमाभित्र प्रतिवेदन पेश गर्न कार्यादेश प्रदान गरिने उल्लेख गरिएको छ।

कार्यसूचीअनुसार, छानबिन समितिले पेश गर्ने प्रतिवेदनका आधारमा आवश्यक थप कारबाही प्रक्रिया अघि बढाइने पनि जनाइएको छ।