नेकपा एमालेको आकस्मिक बैठकले विभिन्न समसामयिक विषयमा केन्द्रित हुँदै ६ वटा निर्णय सार्वजनिक गरेको छ।
च्यासलमा बसेको बैठकले संसदीय दलको नेता चयनको विषयमा भइरहेको आलोचनाप्रति स्पष्ट पार्दै उक्त प्रक्रियामा पार्टीको कुनै हस्तक्षेप नरहेको जनाएको छ।
त्यसैगरी, नेता रामबहादुर थापा ‘बादल’ले प्रतिनिधिसभामा व्यक्त गरेको विवादास्पद अभिव्यक्तिलाई पार्टीले सच्याएको जनाएको छ।
बैठकले प्रतिनिधिसभा निर्वाचनमार्फत अभिव्यक्त जनमतलाई सम्मान गर्ने औपचारिक निर्णय गरेको छ। साथै, वालेन्द्र शाह नेतृत्वको सरकार, निर्वाचनमा सहभागी मतदाता, निर्वाचन आयोग, सुरक्षा निकाय, राष्ट्रसेवक कर्मचारी, प्रहरी, पर्यवेक्षक, सञ्चारकर्मी तथा नागरिक समाजप्रति धन्यवाद व्यक्त गरिएको उपमहासचिव लेखराज भट्टले जानकारी दिए।
सचिवालय बैठकले पार्टी कार्यकर्ता तथा समर्थक, विशेषगरी महिलाविरुद्ध भइरहेका साइबर आक्रमणप्रति गम्भीर ध्यानाकर्षण भएको जनाएको छ। यस्ता आक्रमणको प्रतिवाद गर्न र कानुनी प्रक्रियामा सक्रिय हुन पार्टी पङ्क्तिलाई आह्वान गरिएको छ। साथै, संलग्न व्यक्तिमाथि कारबाही गर्न सरकारको ध्यानाकर्षण गराइएको छ।
यसैगरी, विद्यार्थी संगठन खारेजी तथा प्रतिबन्धको निर्णय फिर्ता लिन सरकारसँग आग्रह गरिएको छ। निजी सञ्चार माध्यममा सरकारी विज्ञापन रोक्ने निर्णयले प्रेस स्वतन्त्रतालाई कमजोर बनाउने ठहर पनि एमालेले गरेको छ।
बैठकले पश्चिम एसियामा जारी हिंसाका कारण ठूलो संख्यामा नेपाली असुरक्षित भएको उल्लेख गर्दै स्वदेश फर्कन चाहने नागरिकको सुरक्षित उद्धारको व्यवस्था गर्न सरकारसँग माग गरेको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
