भौतिक पूर्वाधार तथा यातायात मन्त्रालयले नागढुङ्गा सुरुङमार्ग प्रयोग गर्ने सवारीसाधनका लागि शुल्क दर सार्वजनिक गरेको छ।

मन्त्रालयले राजपत्रमा सूचना प्रकाशित गर्दै नेपाल सरकार मन्त्रिपरिषद्को निर्णयअनुसार सुरुङमार्ग प्रयोगबापत सवारीसाधनबाट दस्तुर लिने व्यवस्था लागू गरिएको जनाएको छ।

सडक बोर्ड ऐन, २०५८ को दफा ६ को उपदफा (१) अनुसार प्राप्त अधिकार प्रयोग गर्दै मन्त्रिपरिषद्ले गत साउन २६ गते शुल्क निर्धारण गर्ने निर्णय गरेको थियो। सोही आधारमा आज दर सार्वजनिक गरिएको हो।

प्रकाशित दरअनुसार कार, भ्यान, पिकअप, ट्याक्टर, माइक्रोबस तथा अन्य हलुका सवारीसाधनका लागि काठमाडौं प्रवेश गर्दा ६५ रुपैयाँ र बाहिरिँदा ६० रुपैयाँ शुल्क तोकिएको छ।

मिनी बस तथा मिनी टिपर/ट्रकका लागि प्रवेश शुल्क ११५ रुपैयाँ र बाहिरिँदा ८० रुपैयाँ निर्धारण गरिएको छ।

त्यसैगरी बस तथा सिङ्गल रियर एक्सल ट्रकका लागि प्रवेश गर्दा २६० रुपैयाँ र बाहिरिँदा २०० रुपैयाँ शुल्क कायम गरिएको छ।

मल्टी एक्सल ट्रक तथा भारी उपकरणका लागि प्रवेश शुल्क ६०० रुपैयाँ र बाहिरिँदा २५० रुपैयाँ तोकिएको मन्त्रालयले जनाएको छ।