प्रधानमन्त्री बालेन्द्र (बालेन) शाहसहित विभिन्न नेताहरूमाथि अपमानजनक र गालीगलौजयुक्त सामग्री प्रसारण गरेको आरोपमा एक युट्युबर पक्राउ परेका छन्।

पक्राउ पर्नेमा पाँचथरको फाल्गुनन्द गाउँपालिका–७ घर भएका रोशन पोखरेल रहेका छन्। उनी ‘Hades’ नामक युट्युब च्यानलमार्फत सामग्री प्रसारण गर्दै आएका थिए।

नेपाल प्रहरीको साइबर ब्युरोले गरेको अनुसन्धानका आधारमा जिल्ला प्रहरी कार्यालय पाँचथरले उनलाई नियन्त्रणमा लिएको हो। प्रहरीले उक्त च्यानलमा राखिएका सामग्रीकै आधारमा कारबाही प्रक्रिया अघि बढाएको जनाएको छ।

जिल्ला प्रहरी कार्यालय पाँचथरका प्रमुख डीएसपी अनिश कर्णका अनुसार पक्राउ परेका पोखरेलमाथि साइबर अपराधसम्बन्धी मुद्दामा अनुसन्धान भइरहेको छ। यसका लागि जिल्ला अदालत पाँचथरले १० दिनको म्याद थप गरिसकेको छ।

प्रहरीका अनुसार घटनाबारे थप अनुसन्धान जारी रहेको छ र प्राप्त तथ्यका आधारमा आगामी प्रक्रिया अघि बढाइने बताइएको छ।