सरकारले अन्तर्राष्ट्रिय सम्बन्धलाई सन्तुलित र गतिशील बनाउने लक्ष्यसहित नयाँ कूटनीतिक प्रतिबद्धता सार्वजनिक गरेको छ ।
मंगलबार सार्वजनिक गरिएको राष्ट्रिय प्रतिबद्धतामा नेपालले आफ्नो सार्वभौमसत्ता, भौगोलिक अखण्डता र राष्ट्रिय हितलाई पहिलो प्राथमिकतामा राख्दै बदलिँदो विश्व राजनीति र छिमेकी शक्तिहरूको उदयलाई विकासको अवसरमा रूपान्तरण गर्ने नीति लिएको जनाएको छ ।
सरकारले कूटनीतिक क्षेत्रलाई प्रभावकारी बनाउन ‘परफरमेन्स अडिट’ प्रणाली लागू गर्ने उल्लेख गरेको छ । यसमार्फत विदेशस्थित नियोगहरूको काम, सक्रियता र नतिजाको मूल्यांकन वैज्ञानिक ढंगले गरिने बताइएको छ ।
प्रतिबद्धता पत्रमा नेपाललाई ‘बफर स्टेट’ बाट ‘भाइब्रेन्ट ब्रिज’ मा रूपान्तरण गर्ने लक्ष्यसमेत राखिएको छ । त्रिपक्षीय आर्थिक साझेदारी र कनेक्टिभिटी विस्तारमार्फत राष्ट्रिय हित सुनिश्चित गर्ने सरकारको योजना छ ।
त्यसैगरी, नेपालले कुनै पनि सैन्य गठजोडमा नजाने स्पष्ट नीति दोहोर्याएको छ । युद्ध, हतियारको प्रतिस्पर्धा र सैन्य गठबन्धनले शान्तिमा असर पार्ने भन्दै सबै देशसँग समदूरी र समनिकटताको सम्बन्ध राख्ने नीति अपनाइने जनाइएको छ ।
सरकारले ‘नेपाल प्रथमः नेपाली प्रथम’ अवधारणालाई कूटनीतिक नीतिको केन्द्रमा राख्ने जनाएको छ ।
आर्थिक कूटनीतिलाई प्राथमिकतामा राख्दै ‘सगरमाथा संवाद’ जस्ता अन्तर्राष्ट्रिय कार्यक्रमलाई निरन्तरता दिइने पनि उल्लेख छ । साथै, जलवायु परिवर्तन, हिमालय संरक्षण, पर्वतीय क्षेत्रका मुद्दा तथा भूपरिवेष्टित देशहरूको साझा चासोका विषयमा अन्तर्राष्ट्रिय मञ्चमा नेपालको भूमिका सशक्त बनाइने सरकारको प्रतिबद्धता छ ।
विदेशमा कार्यरत नेपाली कामदारहरूको हकहित, सुरक्षा र सामाजिक सुरक्षाका विषयमा पनि अन्तर्राष्ट्रिय समन्वयलाई थप सुदृढ बनाइने बताइएको छ ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
