धनगढी उपमहानगरपालिकाले संघीय सरकारको निर्णयलाई नमानेर भोलिदेखि नै विद्यार्थी भर्ना अभियान सञ्चालन गर्न विद्यालयहरूलाई निर्देशन दिएको छ।
उपमहानगरका मेयर गोपाल हमालले बिहीबार सूचना जारी गर्दै वैशाख ४ गतेदेखि भर्ना अभियान सुरु गर्न र वैशाख १४ गतेदेखि नियमित पठनपाठन सञ्चालन गर्न निर्देशन दिएका हुन्।
संघीय सरकारअन्तर्गत शिक्षा तथा मानव स्रोत विकास केन्द्र, सानोठिमी भक्तपुरले चैत २६ गते सबै स्थानीय तहलाई पत्राचार गर्दै वैशाख १५ गतेदेखि भर्ना अभियान र वैशाख २१ गतेदेखि कक्षा सञ्चालन गर्ने तालिका तय गरेको थियो।
तर धनगढी उपमहानगरपालिकाले उक्त तालिका कार्यान्वयन नगर्ने निर्णय गरेको छ। उपमहानगरका अनुसार सरोकारवालाबाट प्राप्त सुझावका आधारमा यस्तो निर्णय गरिएको हो।
सूचनामा उल्लेख भएअनुसार, संघीय तालिकाअनुसार ढिलो भर्ना र पठनपाठन सुरु गर्दा विद्यार्थीको अध्ययन प्रभावित हुने, वार्षिक कार्यघण्टा नपुग्ने तथा शिक्षाको गुणस्तरमा असर पर्ने चिन्ता व्यक्त गरिएको छ।
यही कारण नगर शिक्षा समितिको बैठकले उपमहानगरभित्रका सबै सामुदायिक र संस्थागत विद्यालयलाई वैशाख ४ देखि ११ गतेसम्म भर्ना अभियान सञ्चालन गर्न र वैशाख १४ गतेदेखि नियमित कक्षा सञ्चालन गर्न व्यवस्था मिलाउन निर्देशन दिएको जनाएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
