सरकारी अस्पतालहरूको ओपीडी सेवा फेरि आइतबार बन्द रहने भएको छ। सरकारले हप्तामा दुई दिन सार्वजनिक बिदा दिने निर्णय कार्यान्वयन गर्दै आइतबारको बिदा पुनः कायम गरेको हो।

यसअघि स्वास्थ्य तथा जनसंख्या मन्त्रालयले बिरामीलाई सहजता दिन आइतबार पनि ओपीडी सेवा सञ्चालन गर्न अस्पतालहरूलाई आग्रह गरेको थियो। तर, चिकित्सक संघले सो दिन ओपीडी सञ्चालन गर्न नसक्ने जनाएपछि सरकार आफ्नो निर्णयबाट पछि हटेको हो।

मन्त्रालयले शुक्रबार जारी गरेको विज्ञप्तिमा हप्तामा शनिबार र आइतबार सार्वजनिक बिदा लागू हुँदा पनि स्वास्थ्य सेवा अवरुद्ध नहुने उल्लेख गरेको छ।

मन्त्रालयका अनुसार अस्पतालहरूमा आकस्मिक र अन्तरंग सेवा भने २४ सै घण्टा यथावत सञ्चालनमा रहनेछन्, जसबाट बिरामीको निरन्तर हेरचाह सुनिश्चित गरिनेछ।

आइतबारका लागि तय भएका शल्यक्रिया (ओटी) लगायतका सेवा बिरामीको सहजतालाई ध्यानमा राखेर पुनः तालिका मिलाइने मन्त्रालयले जनाएको छ।

सेवा उपलब्ध नभएको अवस्थामा बिरामीलाई नजिकको उपयुक्त अस्पतालमा रेफर गरिने व्यवस्था मिलाइनेछ भने एम्बुलेन्स सेवा सधैं तयारी अवस्थामा राखिने पनि उल्लेख गरिएको छ।

मन्त्रालयले बिदाका दिनमा पनि स्वास्थ्य सेवा प्रभावित नहोस् भन्ने उद्देश्यले अस्पतालहरूलाई आवश्यक सेवा उपलब्ध गराउन निर्देशन दिएको छ। साथै, उपलब्ध सेवाबारे जानकारी वेबसाइट र सूचना पाटीमार्फत सार्वजनिक गर्न आग्रह गरिएको छ।