अभिनेता विपिन कार्की मुख्य भूमिकामा रहेको फिल्म ‘काजी’ को प्रदर्शन मिति सार्वजनिक गरिएको छ। आइतबार प्रिभ्यू सार्वजनिक गर्दै निर्माण टिमले फिल्म आगामी जेठ ८ गतेदेखि प्रदर्शनमा आउने जानकारी दिएको हो।

फिल्मप्रति अभिनेता विपिन कार्की उत्साहित देखिएका छन्। केही दिनअघि एक प्रिमियर कार्यक्रममा उनले ‘काजी’ लाई क्लासिक प्रेमकथाका रूपमा प्रस्तुत गर्दै यसप्रति आफ्नो भरोसा व्यक्त गरेका थिए। उनले यस फिल्मले आफ्नो अघिल्लो फिल्म ‘उनको स्वीटर’ जस्तै दर्शकलाई नयाँ अनुभव दिने विश्वास व्यक्त गरेका छन्।

उनका अनुसार फिल्मको कथावस्तु प्रभावशाली प्रेमकथामा आधारित छ, जसलाई ‘मुनामदन’ जस्तै गहिरो भावनासँग तुलना गर्न सकिने बताइएको छ।

फिल्ममा अभिनेत्री केकी अधिकारी ‘कजिनी’ पात्रमा देखिएकी छन्। निर्माण टिमका अनुसार प्रिभ्यू सार्वजनिक भएसँगै दर्शकमाझ फिल्मप्रति चासो बढ्ने अपेक्षा गरिएको छ। विवाहपछिको सम्बन्ध र प्रेमकथालाई केन्द्रमा राखेर तयार पारिएको फिल्मले दर्शकलाई आकर्षित गर्ने विश्वास गरिएको छ।

फिल्ममा विपिन कार्की र केकी अधिकारीसँगै गरिमा शर्मा, प्रकाश घिमिरे, हेमन्त बुढाथोकी, विशाल पहारी, विनोद न्यौपाने, रश्मी भट्ट, हिउँवाला गौतम, सन्दीपबाबु लोहनी, रोजी श्रेष्ठ, गंगा शर्मा, नवराज गिरि, बुद्धी सागर खनाल, प्रशंसा सुवेदी, कृतिका शर्मा र बाल कलाकार दीक्षित्ता अर्यालको अभिनय रहेको छ।

रामप्रसाद रिजालको प्रस्तुति रहेको फिल्मलाई लक्ष्मण रिजालले निर्देशन गरेका हुन्। प्रदीप भारद्वाजको लेखन रहेको फिल्मको छायांकन चिन्तन राजभण्डारीले गरेका छन् भने संगीत कालिप्रसाद बास्कोटाको रहेको छ।

फिल्ममा प्रोडक्सन डिजाइन ओजस्वी ओझा, रंग संयोजन श्याम कुँवर, लोकेशन ध्वनि सागर अर्याल र पार्श्व संगीत सुजिल कर्माचार्यले सम्हालेका छन्। क्रिएटिभ हेड रोनाल्ड श्रेष्ठ, नृत्य निर्देशक कविराज गहतराज, प्रोडक्सन हेड प्रकाश हमाल, सम्पादन सुपरभाइजर बनिश शाह र सम्पादक विपिन मल्ल रहेका छन्।

कार्यकारी निर्माता असिम काफ्ले तथा निर्माता नेहान रिजाल र विकास राज जोशी हुन्। फिल्मको वितरण श्रीराम बालाजी फिल्मस्‌ले गर्नेछ।