रास्वपा सभापति रवि लामिछाने भारतको औपचारिक भ्रमणमा जाने भएका छन् । भारत सरकारको औपचारिक निमन्त्रणामा नै भ्रमण तय भएको रास्वपा स्रोतले जनाएको छ ।
रास्वपा गठनपश्चात नयाँ राजनीतिक परिस्थितिबीच नेपाल–भारत सम्बन्धमा उच्चस्तरीय भ्रमणहरू नियमित रूपमा हुन सकेका छैनन् । यसबीच भारतीय विदेश सचिवको नेपाल भ्रमण पनि स्थगित भएको थियो भने नेपालका परराष्ट्रमन्त्री शिशिर खनालको भारत भ्रमण पनि रोकिएको हो ।
मन्त्री खनाल जेठ १८ गते नयाँ दिल्लीमा हुने ‘बिग क्याट अलाइन्स’ सम्मेलनमा सहभागी हुने तयारीमा थिए । तर उक्त सम्मेलन नै स्थगित भएपछि उनको भारत यात्रा पनि रद्द भएको हो ।
रास्वपा स्रोतका अनुसार भारतीय विदेश मन्त्रालयले सभापति लामिछानेलाई दुई दिनको औपचारिक भ्रमणका लागि निमन्त्रणा पठाएको हो । उनी पनि जेठ १८ कै आसपास भारत जाने तयारीमा रहेका छन् ।
भ्रमणका क्रममा लामिछानेले भारतीय प्रधानमन्त्री नरेन्द्र मोदी र विदेशमन्त्री एस जयशंकरसँग औपचारिक भेटवार्ता गर्ने कार्यक्रम रहेको बताइएको छ ।
नयाँ सरकार गठनपछि दुई देशबीचको सम्बन्ध केही चिसिएको चर्चा भइरहेका बेला यो भ्रमणलाई राजनीतिक तथा कूटनीतिक दृष्टिले महत्वपूर्ण रूपमा हेरिएको छ ।
यसैबीच भारतले प्रधानमन्त्री बालेन्द्र शाहलाई पनि औपचारिक भ्रमणको निम्तो दिएको थियो । तर अहिलेसम्म भ्रमणको मिति तय भइसकेको छैन ।
भारतीय पक्षले परम्परागत रूपमा नेपालका प्रधानमन्त्रीको पहिलो विदेश भ्रमण भारतमै गराउने प्रयास गर्दै आएको छ । तर प्रधानमन्त्री शाह भने आवश्यकता र प्राथमिकताका आधारमा जुनसुकै देशमा पनि भ्रमण गर्न सकिने अवस्थामा रहेको बताइन्छ ।
यसअघि प्रधानमन्त्री शाहको भारत भ्रमणको तयारीका लागि भारतीय पक्षले विदेश सचिवमार्फत नेपालमा कूटनीतिक संवाद अघि बढाउन खोजेको थियो । तर प्रधानमन्त्रीसँग उच्चस्तरीय भेट नहुने अवस्था देखिएपछि उक्त प्रयास रोकिएको बताइएको छ ।
प्रधानमन्त्री शाहले विदेशमन्त्रीभन्दा तल्लो स्तरका विदेशी प्रतिनिधिसँग अत्यावश्यक अवस्थामा बाहेक भेट नगर्ने प्रोटोकल बनाएको विषय पनि यसअघि सार्वजनिक भएको थियो ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
