सरकारले डा. श्रीकृष्ण गिरीलाई चिकित्सा शिक्षा आयोगको उपाध्यक्षको जिम्मेवारी दिएको छ।

प्रधानमन्त्री तथा आयोगका अध्यक्ष बालेन्द्र शाहले डा. गिरीलाई अर्को व्यवस्था नभएसम्मका लागि उपाध्यक्षको जिम्मेवारी तोकेको जनाएको छ।

डा. गोविन्द केसीको मागअनुसार नै प्रधानमन्त्री शाहले आयोगको पूर्वउपाध्यक्षलाई तत्कालका लागि जिम्मेवारी दिएका हुन्।

सरकारले ‘सार्वजनिक पदाधिकारीको पदमुक्तिसम्बन्धी विशेष व्यवस्था गर्न बनेको अध्यादेश’ जारी गरेपछि आयोगका तत्कालीन उपाध्यक्ष डा. अञ्जनीकुमार झासहितका पदाधिकारी पदमुक्त भएका थिए। पदाधिकारी पदमुक्त भएपछि आयोगको उपाध्यक्ष पद रिक्त रहेको थियो।

यसअघि पनि डा. गिरी नै आयोगको उपाध्यक्ष रहेका थिए। उनी आयोगका पहिलो उपाध्यक्षसमेत हुन्।

मंगलबार उनले औपचारिक रूपमा जिम्मेवारी सम्हालेका छन्। आयोगको कार्यालय पुगेर उनले कामकाज सुरु गरिसकेको जानकारी दिएका छन्।

स्वास्थ्य तथा शिक्षा क्षेत्र सुधारका अभियन्ता डा. गोविन्द केसीले सोमबार विज्ञप्ति जारी गर्दै अर्को व्यवस्था नहुँदासम्म आयोगको कामकाज सञ्चालनका लागि जिम्मेवारी तोक्न सरकारलाई आग्रह गरेका थिए। उनले तत्कालका लागि पहिले नेतृत्व गरिसकेका व्यक्तिलाई नै जिम्मेवारी दिन उपयुक्त हुने सुझाव दिएका थिए।