राष्ट्रिय स्वतन्त्र पार्टी (रास्वपा) की सांसद आशिका तामाङले प्रधानमन्त्री बालेन्द्र शाहसँग नेपालले भारतको भूमि अतिक्रमण गरेको भनिएको विषयमा तथ्य सार्वजनिक गर्न माग गरेकी छन्।
प्रतिनिधिसभा बैठकमा बोल्दै सांसद तामाङले प्रधानमन्त्रीको पछिल्लो अभिव्यक्तिप्रति ध्यानाकर्षण गराउँदै नेपालले भारतको भूमि कहाँ र कसरी अतिक्रमण गरेको हो भन्ने स्पष्ट पार्न आग्रह गरिन्।
उनले अहिलेसम्म नेपाली नागरिकले भारतले नेपाली भूमि अतिक्रमण गरेको विषय मात्रै सुन्दै आएको उल्लेख गर्दै प्रधानमन्त्रीको भनाइले नयाँ बहस जन्माएको बताइन्।
सांसद तामाङले भनिन्, “प्रधानमन्त्रीज्यूले नेपालले भारतको भूमि कहाँ–कहाँ अतिक्रमण गरेको छ, त्यसको तथ्य सार्वजनिक गरिदिनुहुन हार्दिक अपिल गर्दछु। किनकि सधैँभरि मलगायत हामी नेपालीहरूले भारतले मात्र अतिक्रमण गरेको तथ्य थाहा पाएका थियौँ। तर आजबाट हामीले बुझ्नुपर्ने दिन आएको छ कि हामीले पनि छिमेकी देशको भूमि अतिक्रमण गरेका रहेछौँ।”
उनले प्रधानमन्त्रीले दिएको अभिव्यक्तिको पुष्टि तथ्य र प्रमाणका आधारमा गर्नुपर्ने बताइन्।
तामाङले नेपालले छिमेकी मुलुकको भूमि अतिक्रमण गरेको दाबी गरिएको हो भने त्यसबारे सरकार स्पष्ट हुनुपर्ने धारणा राखिन्।
प्रधानमन्त्री शाहको हालैको अभिव्यक्तिपछि राजनीतिक वृत्तमा नेपाल–भारत सीमा सम्बन्धी विषय फेरि चर्चा र बहसको केन्द्रमा पुगेको छ। यही सन्दर्भमा सांसद तामाङले संसद्बाटै प्रधानमन्त्रीसँग सार्वजनिक रूपमा तथ्य प्रस्तुत गर्न माग गरेकी हुन्।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
