देशको शेयर बजार ओरालो लाग्ने क्रम आइतबार पनि थामिएन। कारोबार रकम अघिल्लो दिनको तुलनामा बढेपनि बजारका सबै सूचकमा गिरावट आएको छ।
आइतबार नेप्से परिसूचक २७.१४ अंकले घटेर २७६१ अंकमा झरेको हो। अघिल्लो बिहीबारको तुलनामा कारोबार रकम बढेर ७ अर्ब ७३ करोड ५१ लाख रुपैयाँ पुगेको छ। तर बजारमा १९१ कम्पनीको शेयर मूल्य घट्दा ५८ कम्पनी मात्रै हरियो देखिए।
यस दिन कारोबारमा आएका १३ वटै उपसमूहको परिसूचकमा गिरावट आएको छ। विशेष गरी व्यापार, अन्य, लघुवित्त, उत्पादन तथा प्रशोधन, र बैंकिङ उपसमूहको परिसूचक १ प्रतिशत भन्दा धेरैले घटेको छ।
विश्लेषकहरूका अनुसार बजार लगातार ओरालो लागिरहँदा लगानीकर्ताहरू ‘स्टप–लस’ को डरले शेयर बिक्रीमा सक्रिय भएका छन्। खरिदभन्दा बिक्री दबाब बढ्दा बजारमा मनोवैज्ञानिक असर स्पष्ट देखिएको छ। पछिल्लो समय लगातार दोहोरो अंकले सूचक घटिरहँदा लगानीकर्तामाझ प्यानिक बढ्दै गएको हो।
पछिल्लो वर्ष साउन ३१ गते ३००० अंक पार गरेको बजार यसपटक फेरि ओरालो लागेर २७०० अंक नजिक पुगेको छ।
यस दिन आरबीबी म्युचुअल फण्ड १ को इकाई मूल्य ७.९३ प्रतिशतले बढ्दा शीर्ष वृद्धि भएको छ। त्यसैगरी अपर स्याङ्गी हाइड्रोपावर ६.२९ प्रतिशत, कालिका पावर र अपर हेवा खोला हाइड्रोपावरको मूल्य ५ प्रतिशतभन्दा बढी बढ्यो।
तर सम्पदा लघुवित्तको शेयर ७.०६ प्रतिशतले घट्दै सर्वाधिक गिरावटमा रह्यो। ट्रेड टावर कम्पनीको शेयर पनि ५.८८ प्रतिशतले घटेर कारोबार भयो।
कारोबार रकमका हिसाबले भने नेपाल रिइन्स्योरेन्स कम्पनी अग्रस्थानमा रह्यो। यस कम्पनीको ५१ करोड ६७ लाख रुपैयाँ बराबरको कारोबार भयो। हिमालयन रिइन्स्योरेन्सले ३५ करोड ४५ लाख र नेपाल रिपब्लिक मिडियाले २४ करोड ९६ लाख रुपैयाँ बराबरको कारोबार गरेका छन्।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
