लगातारको वर्षाका कारण सप्तकोसी नदीमा पानीको सतह तीव्र गतिमा बढेपछि कोसी ब्यारेजका ५६ मध्ये ३८ ढोका खोलिएको छ।
बेलुका १० बजे गरिएको जलसतह मापनअनुसार ब्यारेजमा पानीको प्रवाह प्रतिसेकेन्ड २ लाख ७३ हजार ९२५ क्युसेक पुगेको जिल्ला प्रहरी कार्यालय सुनसरीले जानकारी दिएको छ। दिउँसो ४ बजे प्रवाह २ लाख ५६ हजार १० क्युसेक हुँदा ३४ ढोका मात्र खोलिएका थिए।
खतराको संकेत
जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) योगराज खतिवडाका अनुसार ब्यारेजमा हाल रातो बत्ती बालिएको छ। “एक लाख ५० हजार क्युसेकभन्दा बढी प्रवाह भएपछि रातो बत्ती बालिन्छ, जसले खतराको सम्भावना रहेको जनाउँछ। यसले स्थानीयवासीलाई सतर्क रहन सन्देश दिन्छ,” उनले भने।
सतर्कता अपनाउन आग्रह
हालसम्म डुबानको प्रत्यक्ष जोखिम नरहे पनि पहाडी क्षेत्रमा लगातार वर्षा जारी रहेकाले जलसतह अझै बढ्न सक्ने प्रक्षेपण गरिएको छ। यस कारण सप्तकोसी आसपासका बासिन्दा र सरोकारवालालाई सतर्क रहन, जोखिमपूर्ण स्थानमा नजान र आवश्यक तयारी गर्न प्रहरी प्रशासनले आग्रह गरेको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
