सञ्चारकर्मी तथा टेलिभिजन प्रस्तोता राजेन्द्र बानियाँ अब युट्युबमा आफ्नो नयाँ यात्रा सुरु गर्न तयारी अवस्थामा छन्।
बानियाँका निकट साथी र युट्युबर टीकाराम यात्रीले सोमबार राति सामाजिक सञ्जाल फेसबुकमार्फत बानियाँको युट्युब यात्राबारे जानकारी दिएका हुन्। उनले बानियाँको आधिकारिक युट्युब च्यानलको लिङ्क शेयर गर्दै दर्शक तथा शुभेच्छुकलाई “प्रोत्साहन, आलोचना र समर्थनका साथ साथ दिनुहोस्” भन्दै अनुरोध गरेका छन्।
यात्रीका अनुसार बानियाँ अब युट्युबमार्फत वास्तविक सामाजिक कथा र भुइँ–स्तरका रिपोर्टमा केन्द्रित हुने तयारीमा छन्। उनले यसलाई ‘मुलधारको टेलिभिजन पत्रकारिताबाट स्वतन्त्र अनलाइन पत्रकारितातर्फको रूपान्तरण’ भनेका छन्।
हाल बानियाँ हिमालय टेलिभिजनका प्रधान सम्पादकको जिम्मेवारीमा छन्। तर, उनले टेलिभिजन छोडेका छन् कि छैनन् भन्नेबारे औपचारिक पुष्टि भने भएको छैन।
यात्री स्वयं पनि टेलिभिजनको सम्पादक रहेर युट्युबमा प्रवेश गरेका थिए। यसअघि दिलभूषण पाठक र विजयकुमार पाण्डेले समेत युट्युबलाई आफ्नै पत्रकारिताको नयाँ माध्यम बनाएका थिए।
बानियाँको प्रवेशसँगै युट्युबमा अब अर्को अनुभवी नाम थपिएको छ, जसले अनलाइन पत्रकारितामा नयाँ स्वाद ल्याउने अपेक्षा गरिएको छ।
