प्रधानमन्त्री सुशीला कार्कीले वैदेशिक रोजगारीलाई सुरक्षित, पारदर्शी र सम्मानजनक बनाउनुका साथै यसलाई निःशुल्क गर्ने दिशामा नीतिगत पहल आवश्यक रहेको बताएकी छन्।
वैदेशिक रोजगार बोर्डको १८औँ स्थापना दिवसको अवसरमा आयोजित कार्यक्रममा प्रधानमन्त्री कार्कीले वैदेशिक रोजगारीबाट फर्किएका श्रमिकको सामाजिक सुरक्षा र परिवारमा सम्मानजनक एकीकरण सुनिश्चित गर्न बोर्डलाई निर्देशन दिइन्। उनले वैदेशिक रोजगारमा जानेहरूलाई दक्ष बनाइ आवश्यक सीप सिकाउनुपर्नेमा जोड दिइन्।
प्रधानमन्त्रीले वैदेशिक रोजगारीबाट आर्जित पुँजी, सीप, प्रविधि र अनुभवलाई स्वदेशमा उत्पादनमूलक क्षेत्रमा लगानी गर्न प्रोत्साहित गर्नुपर्नेमा सरकारको नीति रहेको पनि जनाइन्। यसैगरी, वैदेशिक रोजगारीमा उत्पन्न हुने समस्याहरू समाधान गर्न बोर्डले सुरु गरेका ‘कल सेन्टर’ र ‘टेलिमेडिसिन’ सेवा श्रमिक हितका दृष्टिले उपयोगी देखिएको उनले उल्लेख गरिन्।
प्रधानमन्त्री कार्कीले अब वैदेशिक रोजगारीको विकल्पस्वरूप स्वदेशमै सम्मानजनक रोजगारीका अवसर सृजना गर्न, सीप आधारित उद्यम र पुनः एकीकरणका कार्यक्रम विस्तार गर्न प्राथमिकता दिनुपर्ने बताइन्। यसका लागि श्रम रोजगार तथा सामाजिक सुरक्षा मन्त्रालयलाई कार्ययोजना तयार पारेर तदनुरूप काम गर्न निर्देशन दिइएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
