आगामी फागुन २१ गते तय गरिएको प्रतिनिधिसभा निर्वाचनलाई लक्षित गर्दै निर्वाचन आयोगले प्रमुख राजनीतिक दलका नेताहरूसँग आचारसंहिता र तयारीबारे अन्तिम चरणको छलफल थालेको छ। आयोगको केन्द्रीय कार्यालय, कान्तिपथमा अहिले दलका शीर्ष नेताहरू सहभागी भएर बैठक चलिरहेको छ।
आयोगले निर्वाचनको तयारी, आचारसंहिता कार्यान्वयन र दलहरूको अपेक्षाबारे प्रत्यक्ष संवादका लागि यो छलफल आयोजना गरेको हो। प्रमुख कार्यवाहक निर्वाचन आयुक्त रामप्रसाद भण्डारीको संयोजनमा भइरहेको छलफलमा आयुक्त डा. जानकीकुमारी तुलाधर र सगुन शमशेर जबरा पनि उपस्थित छन्।
दलहरूको तर्फबाट नेपाली कांग्रेसकी नेतृ पुष्पा भुसाल, एमालेका खगराज अधिकारी, र नेकपाका लिलामणि पोखरेल लगायतका नेताहरू सहभागी छन्। बैठकमा निर्वाचन प्रक्रिया पारदर्शी बनाउन आवश्यक व्यवस्थागत तयारी र आचारसंहिता उल्लङ्घन रोक्नका उपायमाथि छलफल भइरहेको बताइएको छ।
यसअघि बुधबार आयोगले प्रधानमन्त्री सुशीला कार्कीलाई निर्वाचन तयारीबारे विस्तृत जानकारी दिएको थियो। आयोगले अब दलहरूसँग निरन्तर संवादमार्फत निर्वाचन सफल बनाउने तयारी तीव्र पारेको जनाएको छ।
उता, विपक्षी दलहरूले भने सरकार निर्वाचनको वातावरण निर्माणमा गम्भीर नभएको आरोप लगाउँदै आएका छन्। आयोगले भने सबै दलको सहकार्यबिना निष्पक्ष निर्वाचन सम्भव नहुने भन्दै सहमतिको वातावरण बनाउन पहल अघि बढाएको स्पष्ट पारेको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
