कञ्चनपुरमा आगामी फागुन २१ गते हुने प्रतिनिधिसभा निर्वाचनका लागि तीन हजार १२५ नयाँ मतदाता थपिएका छन्। जिल्ला निर्वाचन कार्यालयका अनुसार शनिबारसम्म दर्ता भएका नयाँ मतदातामध्ये एक हजार ६८९ पुरुष र एक हजार ४३६ महिला छन्। बाहिरी जिल्लाबाट समेत पुरुष १३७ र महिला ९१ जनाले नाम दर्ता गराएका छन्।
नयाँ दर्तासहित जिल्लामा कुल मतदाता संख्या तीन लाख तीन हजार ८७ पुगेको छ। निर्वाचन कार्यालयले असोजदेखि सुरु गरेको मतदाता नामावली सङ्कलनमा देखिएको उत्साहका कारण म्याद मङ्सिर ५ गतेसम्म बढाइएको छ। राष्ट्रिय परिचयपत्र वा प्रि–रजिष्ट्रेसन सिस्टममार्फत आवेदन गरी फोटो र औँठाछाप दिएर दर्ता गर्न सकिने व्यवस्था छ।
जिल्लामा हाल एक सय ३२ मतदानस्थल र तीन सय ४६ मतदान केन्द्र छन्। समय अभावका कारण थप हुने सम्भावना नभए पनि कृष्णपुर नगरपालिकाका वडा ५ र ८ का दुई मतदानस्थल भने सारिएका छन्। वडा ५ को नगरपालिका भवनमा रहेको मतदानस्थल कञ्चन बहुमुखी क्याम्पसमा र वडा ८ को स्वास्थ्यचौकीस्थित मतदानस्थल विणा माध्यमिक विद्यालयमा सारिएको निर्वाचन कार्यालयले जनाएको छ।
सबै मतदानस्थल र केन्द्रलाई अपाङ्ग, महिला र ज्येष्ठ नागरिकमैत्री बनाइने तयारी भइरहेको कार्यालयले बताएको छ।
