बाराको सिमरामा जेनजी युवाले राजमार्ग अवरुद्ध गर्दै गर्दै आएको आजको प्रदर्शन प्रशासनले कुटपिटमा संलग्न व्यक्तिलाई पक्राउ गर्ने आश्वासन दिएपछि स्थगित भएको छ। प्रदर्शन रोकिएसँगै अवरुद्ध सडकहरु सुचारु भएका छन्।
जेनजी युवाका अनुसार प्रशासनसँगको छलफलपछि आजको आन्दोलन थामिएको हो। उनीहरूले शुक्रबार फेरि प्रशासनसँग औपचारिक वार्ता गर्ने भएका छन्।
आफूहरूमाथि भएको कुटपिटको घटनामा संलग्नलाई कारबाहीको माग गर्दै जेनजी युवाले बिहीबार पनि दोस्रो दिन सडकमा उत्रिएका थिए। सो क्रममा प्रहरीले हस्तक्षेप गर्दा झडप भएको थियो, जसमा ६ प्रहरी र ४ जना जेनजी घाइते भए। स्थिती नियन्त्रणमा लिन प्रहरीले हवाई फायरसमेत गरेको थियो।
बुधबार एमाले नेता महासचिव शंकर पोखरेल र महेश बस्नेतलाई सिमरा विमानस्थल बाहिर रोकेपछि दुवै पक्षबीच विवाद चर्किँदै झडपमा बदलिएको थियो। त्यसपछि सिमरा लगातार तनावग्रस्त बनेको छ।
स्थिति बिग्रिएको भन्दै प्रशासनले आज दिउँसो १ बजेदेखि राति ८ बजेसम्म कर्फ्यु आदेश जारी गरेको छ।
