कीर्तिपुरस्थित त्रिभुवन विश्वविद्यालय (त्रिवि) परिसरभित्र रहेको क्रिकेट रंगशाला क्षेत्रमा नेपाल प्रिमियर लिग (एनपिएल) खेल हेर्न आउने दर्शकबाट अवैध रूपमा पार्किङ शुल्क असुल गरिएको विषयमा त्रिविले कडा आपत्ति जनाएको छ। विश्वविद्यालयले जारी गरेको सूचनामा यस घटनाप्रति गम्भीर ध्यानाकर्षण भएको उल्लेख गरेको छ।
रजिस्ट्रारको कार्यालयअन्तर्गत सूचना तथा जनसम्पर्क महाशाखाले सूचना मार्फत स्पष्ट पार्दै त्रिविले पार्किङ शुल्कका लागि कसैसँग पनि सम्झौता नगरेको र कुनै प्रकारको अनुमति नदिएको बताएको छ। विश्वविद्यालयको जग्गामा अनुमति बिना शुल्क उठाइनु पूर्ण रूपमा गैरकानुनी रहेको सूचनामा जनाइएको छ।
त्रिविले रंगशालामा असुल गरिएको शुल्कबारे आफू अनभिज्ञ रहेको बताउँदै यस्तो अवैध गतिविधिमा संलग्न नहुन सबैलाई आग्रह गरेको छ। साथै, कसैले पार्किङको नाममा कुनै शुल्क नदिन र अनधिकृत असुलीका बारेमा सतर्क रहन पनि विश्वविद्यालयले सूचित गरेको छ।
सूचना तथा जनसम्पर्क महाशाखा प्रमुख लिली थापाको हस्ताक्षरयुक्त सो सूचनामा यस किसिमको अवैध शुल्क असुलीलाई कुनै पनि हालतमा वैधता नहुने र त्रिविको जग्गामा हुने गतिविधि विश्वविद्यालयकै स्वीकृतिमा मात्र मान्य हुने पुनः दोहोर्याइएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
