पश्चिम नवलपरासीको परासीमा अफ्रिकन स्वाइन फिभर पुष्टि भएपछि हाटबजारमा बंगुरको मासु बिक्रीमा तत्काल प्रतिबन्ध लगाइएको छ। रामग्राम नगरपालिकाले सूचना जारी गर्दै सबै हाटबजार व्यवस्थापनकर्तालाई बंगुरको मासु बिक्री नगर्न निर्देशन दिएको छ।
स्थानीय हाटबजारमा गत कात्तिक २६ गते दुई व्यापारीले बिक्री गरेको शंकास्पद मासुको नमुना परीक्षण गर्दा रोग पुष्टि भएको थियो। पशु रोग अन्वेषण प्रयोगशालामा गरिएको परीक्षणपछि पिसिआरका लागि काठमाडौँ पठाइएका नमूनामा पनि पोजेटिभ देखिएपछि जोखिम बढेको भन्दै बिक्री वितरणमा रोक लगाइएको हो।
जिल्ला प्रशासन कार्यालयले पनि बजार क्षेत्रमा बंगुरको मासु बिक्री वितरण नगर्न सबै व्यापारी र ग्राहकलाई सचेत रहन सूचना जारी गरेको छ। पशु सेवा विभागले यो रोग ‘अति खतरनाक’ महामारीजन्य रोग भएको बताउँदै फर्ममा पालन गरिएका बंगुरका लागि उच्च सावधानी अपनाउन किसानहरूलाई आग्रह गरेको छ।
रामग्राम क्षेत्रका केही फार्ममा पहिले नै बिरामी बंगुर फेला परेपछि स्वास्थ्य जोखिम बढेको र रोगको नियन्त्रणमा प्रशासनिक कदम आवश्यक रहेको जनाइएको छ।
