जेनजी आन्दोलनसँग सम्बन्धित घटनाको छानबिन गरिरहेको उच्चस्तरीय जाँचबुझ आयोगले राष्ट्रिय अनुसन्धान विभागका पूर्व प्रमुख हुतराज थापासँग बयान लिएको छ। बुधबार साँझ आयोगले उनीसँग विस्तृत रूपमा प्रश्न–उत्तर गरेको पुष्टि भएको छ।
थापा भदौ २८ मा तीन वर्षे कार्यकाल पूरा गरी सेवा निवृत्त भएका थिए। जेनजी प्रदर्शनको संवेदनशील चरणमा उनी राष्ट्रिय अनुसन्धान विभागका प्रमुख रहेकाले आयोगले उहाँबाट घटनाको पृष्ठभूमि, निर्णय प्रक्रिया र सूचनाहरूबारे जानकारी लिएको बताइएको छ।
गौरीबहादुर कार्कीको नेतृत्वमा गठन भएको आयोगलाई आन्दोलनको पहिलो दिन किशोरको ज्यान जाने गरी भएको गोली प्रयोग कानुनसम्मत थियो कि थिएन भन्ने विषयमा छानबिन गर्ने कार्यादेश दिइएको छ। साथै, २४ गते विभिन्न ठाउँमा भएको तोडफोड र क्षतिको कारण तथा जिम्मेवारीबारे पनि आयोगले अध्ययन गरिरहेको छ।
आयोगले यति बेला सुरक्षाका अन्य जिम्मेवार अंगहरूका अधिकारीहरूबाट पनि क्रमशः बयान संकलन गरिरहेको जनाइएको छ।
