नेकपा एमालेको नवनिर्वाचित केन्द्रीय कमिटीको पहिलो बैठक आज बस्दैछ। ११औँ महाधिवेशनबाट निर्वाचित केन्द्रीय कमिटीको बैठक दिउँसो १ बजे बबरमहलस्थित कार्की ब्याङ्केटमा आयोजना हुने गरी तय गरिएको छ।
महाधिवेशनमार्फत एमालेले ३०१ सदस्यीय केन्द्रीय कमिटी चयन गरेको हो। नयाँ नेतृत्व र संरचनासहित पार्टीको आगामी कार्यदिशा तय गर्ने उद्देश्यका साथ यो बैठक बोलाइएको जनाइएको छ।
महाधिवेशनमा अध्यक्ष केपी शर्मा ओली र ईश्वर पोखरेल आ–आफ्नो प्यानल बनाएर चुनावी प्रतिस्पर्धामा उत्रिए पनि परिणाममा ओली पक्षले स्पष्ट बहुमत हासिल गरेको छ। १९ सदस्यीय पदाधिकारी संरचनामा ओली पक्षका १७ जना निर्वाचित हुँदा पोखरेल पक्षका दुई जना मात्रै पदाधिकारीमा पुगेका छन्।
त्यसैगरी, केन्द्रीय कमिटीको समग्र संरचनामा पनि ओली पक्षको प्रभाव र बहुमत कायम रहेको छ। आजको बैठकमा नवनिर्वाचित नेतृत्वबीच औपचारिक छलफल, कार्यविभाजन र भावी राजनीतिक एजेन्डाबारे प्रारम्भिक समन्वय हुने अपेक्षा गरिएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
