नेपाली कांग्रेसका महामन्त्री गगनकुमार थापाले क्रियाशील सदस्यता वितरण प्रक्रियालाई व्यवस्थित र पारदर्शी बनाउन चारबुँदे निर्देशन जारी गर्नुभएको छ। उहाँले सबै जिल्ला कार्यसमितिका सभापतिलाई सम्बोधन गर्दै आवश्यक समन्वय र सहजीकरणमा विशेष ध्यान दिन आग्रह गर्नुभएको हो।
महामन्त्री थापाका अनुसार पुनः क्रम सङ्ख्यासहितका नयाँ क्रियाशील सदस्यता फारम प्रतिनिधिसभा क्षेत्रीय कार्यसमितिमा पठाइसकिएको छ। यसअघि फारम वितरण गर्दा केही स्थानमा क्रम सङ्ख्या नसमेटिएका फारमसमेत प्रयोग भएको जानकारी प्राप्त भएकाले त्यसलाई सच्याउन नयाँ व्यवस्था गरिएको उहाँले स्पष्ट पार्नुभयो।
नेपाली कांग्रेसको १५ औँ महाधिवेशनको स्वीकृत कार्यतालिकाअनुसार क्रियाशील सदस्यता नवीकरण र नयाँ सदस्यता वितरण प्रक्रिया, मापदण्ड तथा कार्यविधिबारे जिल्ला कार्यसमिति र प्रतिनिधिसभा क्षेत्रीय कार्यसमितिलाई परिपत्रमार्फत विस्तृत जानकारी दिइएको पनि उहाँले जानकारी दिनुभयो।
महामन्त्री थापाले नयाँ क्रियाशील सदस्यता फारम वितरणका क्रममा जिल्ला कार्यसमितिले प्रतिनिधिसभा क्षेत्रीय कार्यसमिति, प्रदेशसभा क्षेत्रीय कार्यसमिति, गाउँ–नगरपालिका कार्यसमिति तथा वडा कार्यसमितिसँग प्रभावकारी समन्वय, सहजीकरण, सहयोग र अनुगमन गर्नुपर्ने निर्देशन दिनुभएको छ। यसले सदस्यता वितरण प्रक्रियालाई सहज, व्यवस्थित र विश्वसनीय बनाउने अपेक्षा गरिएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
