जेन–जी आन्दोलनका क्रममा केन्द्रीय कारागार कार्यालय, काठमाडौंबाट फरार भएका दुई जना कैदीलाई पर्सा प्रहरीले पक्राउ गरेको छ। जिल्ला प्रहरीले विशेष सूचनाको आधारमा मंगलबार ती दुवै कैदीलाई नियन्त्रणमा लिई वीरगञ्ज कारागारमा बुझाएको हो।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक राजु कार्कीका अनुसार गत भदौ २३ र २४ गते सम्पन्न जेन–जी आन्दोलनका क्रममा केन्द्रीय कारागारबाट फरार भएका कैदीहरूको खोजी भइरहेको थियो। सोही क्रममा प्राप्त सूचनाका आधारमा उनीहरूलाई पर्साबाट पक्राउ गर्न सफल भएको प्रहरीले जनाएको छ।
पक्राउ पर्नेमा बाराको विश्रामपुर गाउँपालिका–२५ का सुदामा पासवान रहेका छन्, जसलाई ‘प्रदेशी’ भनेर चिनिन्छ। उनी केन्द्रीय कारागार कार्यालय, काठमाडौंमा कर्तव्य ज्यान मुद्दामा दोषी ठहर भई २५ वर्ष कैद भुक्तान गरिरहेका थिए। जेन–जी प्रदर्शनका क्रममा उनी कारागारबाट फरार भएका थिए।
त्यस्तै, भदौ २४ गते केन्द्रीय कारागारबाट फरार रहेका बारा परवानीपुर गाउँपालिका–२ का विवेकलाल साह कानुलाई पनि प्रहरीले पक्राउ गरेको छ। उनी उच्च अदालत पाटन इजलास हेटौँडाको आदेशअनुसार ५० हजार रुपैयाँ धरौटी तिर्न नसकेपछि केन्द्रीय कारागार चलान भएका कैदी हुन्।
पक्राउ परेका दुवै कैदीलाई आवश्यक कानुनी प्रक्रिया पूरा गरी वीरगञ्ज कारागारमा बुझाइएको जिल्ला प्रहरीले जनाएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
