परराष्ट्रमन्त्री बालानन्द शर्मा बंगलादेशकी पूर्वप्रधानमन्त्री तथा बंगलादेश नेशनलिस्ट पार्टी (बीएनपी) की अध्यक्ष बेगम खालिदा जियाको अन्त्येष्टिमा सहभागी भएका छन्।
अन्त्येष्टिको क्रममा मन्त्री शर्माले स्व. जियाका छोरा तथा बीएनपीका कार्यवाहक अध्यक्ष रिक रहमानसँग भेट गरी नेपाल सरकार र नेपाली जनताको तर्फबाट समवेदना व्यक्त गरे। उनले खालिदा जिया बंगलादेशको राजनीतिक र लोकतान्त्रिक यात्रामा महत्वपूर्ण योगदान दिने प्रतिष्ठित नेतृ भएको उल्लेख गरे।
रिक रहमानले अन्त्येष्टिमा सहभागी भई श्रद्धाञ्जली अर्पण गरेकोमा परराष्ट्रमन्त्री शर्मालाई धन्यवाद दिँदै नेपाल–बंगलादेशबीचको मैत्री र सहकार्य आगामी दिनमा अझ सुदृढ हुने विश्वास व्यक्त गरे।
यसै दिन दिउँसो परराष्ट्रमन्त्री शर्माले बंगलादेशको अन्तरिम सरकारका प्रमुख सल्लाहकार प्राडा मोहम्मद युनुससँग शिष्टाचार भेटवार्ता गरे। भेटका क्रममा उनले प्रधानमन्त्री सुशीला कार्कीको तर्फबाट खालिदा जियाको निधनप्रति गहिरो दुःख व्यक्त गरिएको सन्देश युनुसलाई हस्तान्तरण गरे।
प्रधानमन्त्रीको सन्देशमा बेगम खालिदा जियाले आफ्नो तीन कार्यकालमा नेपाल–बंगलादेश सम्बन्ध मजबुत बनाउन खेलेको भूमिकाको कृतज्ञतापूर्वक स्मरण गरिएको उल्लेख गरिएको छ।
