गत भदौमा भएको जेनजी आन्दोलनका कारण नेपाल आउने पर्यटक घट्ने अनुमान गरिएको थियो। तर अनुमानविपरीत विदेशी पर्यटकको संख्या बढेको छ।
नेपाल पर्यटन बोर्डले सार्वजनिक गरेको तथ्याङ्कअनुसार सन् २०२५ मा ११ लाख ५८ हजार ४५९ विदेशी पर्यटकले नेपाल भ्रमण गरेका छन्। यो संख्या सन् २०२४ को तुलनामा करिब ११ हजारले बढी हो। सन् २०२४ मा ११ लाख ४७ हजार ५४८ पर्यटक नेपाल आएका थिए।
जेनजी आन्दोलनपछिका महिनामा पर्यटक आगमन झनै बढेको बोर्डको तथ्याङ्कले देखाउँछ। अक्टोबर २०२५ मा एक लाख २८ हजार ४४३ पर्यटक नेपाल आएका छन्, जुन अघिल्लो वर्षको सोही महिनाभन्दा बढी हो। नोभेम्बरमा एक लाख १६ हजार ५५३ र डिसेम्बरमा ९८ हजार १९० पर्यटक नेपाल भित्रिएका छन्।
पछिल्ला केही वर्षयता नेपाल आउने पर्यटकको संख्या निरन्तर बढ्दो क्रममा छ। सन् २०२३ मा १० लाख १४ हजार ८८२ पर्यटक नेपाल आएका थिए भने सन् २०२४ मा यसमा झन्डै एक लाख ४० हजारको वृद्धि भएको थियो।
नेपाल भ्रमण गर्ने पर्यटकमध्ये सबैभन्दा धेरै भारतीय रहेका छन्। सन् २०२५ मा त्रिभुवन अन्तर्राष्ट्रिय विमानस्थल हुँदै दुई लाख ९२ हजार भारतीय पर्यटक नेपाल आएका छन्। भारतपछि अमेरिका, चीन र बङ्गलादेशका पर्यटक बढी छन्।
युरोपेली मुलुकबाट आउने पर्यटकको संख्या पनि बढेको छ। सन् २०२५ मा दुई लाख २१ हजार युरोपेली पर्यटक नेपाल आएका छन्। यसैगरी अस्ट्रेलिया र एसियाली मुलुकहरूबाट आउने पर्यटकको संख्या पनि उत्साहजनक रहेको छ।
मध्यपूर्वका देशबाट नेपाल आउने पर्यटकको चासो पनि पछिल्लो समय बढ्दै गएको छ। पदयात्रा र हिमाल आरोहणप्रति आकर्षण बढेसँगै नेपाल नयाँ गन्तव्यका रूपमा स्थापित हुँदै गएको पर्यटन बोर्डको निष्कर्ष छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
