राष्ट्रिय स्वतन्त्र पार्टी (रास्वपा) का नेता आशिफ साहले पार्टीको समानुपातिक बन्द सूचीबाट आफ्नो उम्मेदवारी फिर्ता लिएका छन् । उनले सामाजिक सञ्जालमार्फत जनताको भावना र पार्टीभित्र उठेका आवाजलाई सम्मान गर्दै यस्तो निर्णय गरेको बताएका छन् ।
साहले आफू सक्रिय राजनीतिमा नरहे पनि देश निर्माणप्रति सधैं चासो राख्दै आएको उल्लेख गरेका छन् । बालेन, रवि र कुलमानबीच सहकार्य सम्भव बनाउने प्रयासमा आफू नजिकबाट संलग्न भएको र सोही क्रममा साथीहरूको आग्रहमा समानुपातिक बन्द सूचीमा नाम समावेश भएको उनको भनाइ छ ।
तर उम्मेदवारी दर्तापछि आएका समाचार, जनताबाट प्राप्त प्रतिक्रिया र पार्टीभित्रका साथीहरूको भावनाले आफूलाई आत्ममन्थन गर्न बाध्य बनाएको साहले बताएका छन् । नियत सही हुँदाहुँदै पनि निर्णयमा कमजोरी भएको अनुभूति भएपछि समानुपातिक सूचीबाट पछि हट्ने निर्णय गरेको उनले स्पष्ट पारेका छन् ।
साहले समानुपातिक प्रणालीमार्फत सांसद बन्ने बाटो आफूले रोज्न नसक्ने बताउँदै देशका लागि आवश्यक योगदान जुनसुकै भूमिकामा रहेर पनि दिने प्रतिबद्धता व्यक्त गरेका छन् । साथै, उनले समानुपातिक सूचीमा रहेका अन्य नेताहरूलाई पनि जनताको भावना बुझ्दै एक कदम पछाडि हट्न आग्रह गरेका छन् ।
प्रत्यक्ष निर्वाचनमार्फत जनताको बीचमा उभिने निर्णय गर्दै साहले काठमाडौं–५ बाट प्रत्यक्ष चुनाव लड्न पूर्ण रूपमा तयार रहेको घोषणा गरेका छन् ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
