तराईका धेरै स्थानमा हुस्सु र कुहिरो लागिरहेको मौसम पूर्वानुमान महाशाखाले जनाएको छ । महाशाखाका अनुसार सोमबार बिहानदेखि नै तराई क्षेत्रमा बाक्लो हुस्सु देखिएको छ ।
मौसम महाशाखाले दिउँसो र राति पनि हुस्सु–कुहिरोको क्रम जारी रहने बताएको छ । साथै, कोसी, गण्डकी र कर्णाली प्रदेशका उच्च पहाडी तथा हिमाली क्षेत्रका एक–दुई स्थानमा हल्का वर्षा र हिमपातको सम्भावना रहेको छ ।
महाशाखाले जारी गरेको चेतावनी अनुसार हुस्सु, कुहिरो, वर्षा र हिमपातका कारण दैनिक जनजीवन, स्वास्थ्य, पर्यटन तथा सडक यातायातमा आंशिक असर पर्न सक्ने देखिएको छ । त्यसैले सम्बन्धित क्षेत्रका बासिन्दालाई आवश्यक सतर्कता अपनाउन आग्रह गरिएको छ ।
आज दिउँसो तराईका अधिकांश स्थानमा हुस्सु रहनेछ भने पहाडी तथा हिमाली भूभागमा आंशिक बदली रहने महाशाखाको अनुमान छ । राति पनि तराईका धेरै स्थानमा हुस्सु लाग्ने र गण्डकी तथा कर्णाली प्रदेशका उच्च पहाडी र हिमाली क्षेत्रमा हल्का वर्षा वा हिमपात हुन सक्ने बताइएको छ ।
मौसमको अवस्था परिवर्तनशील रहेकाले महाशाखाले दैनिक रूपमा जारी हुने अद्यावधिक मौसम सूचना नियमित रूपमा लिन सर्वसाधारणलाई अनुरोध गरेको छ ।
