विशेष अदालतले गैरकानुनी सम्पत्ति आर्जनको अभियोग लागेका कांग्रेसका पूर्व सांसद सन्तोष चालिसेलाई पाँच लाख रुपैयाँ धरौटीमा रिहा गर्न आदेश दिएको छ।
विशेष अदालतका सदस्य नारायणप्रसाद पौडेल र विदुर कोइरालाको इजलासले आइतबार पाँच लाख नगद धरौटी वा सो बराबरको बैंक जमानत बुझाएर चालिसेलाई तारेख मुद्दाको पुर्पक्ष गर्न अनुमति दिएका छन्। अदालतको आदेशमा भनिएको छ, ‘प्रतिवादी सन्तोष चालिसेबाट पाँच लाख रुपैयाँ नगद धरौटी वा सो बराबरको बैंक जमानत लिई तारेखमा राखी मुद्दा पुर्पक्ष गर्नु। यदि धरौटी रकम बुझाउन नसके कारागार पठाइदिनु।’
अर्डरपछि चालिसे धरौटी बुझाएर रिहा हुने प्रक्रियामा छन्।
२०७९ सालमा काठमाडौँ–३ बाट प्रतिनिधिसभा सदस्यमा निर्वाचित हुनुअघि उनी गोकर्णेश्वर नगरपालिकाका मेयर थिए र प्रतिनिधिसभामा अर्थ समितिका सभापति समेत भएका थिए।
अख्तियार दुरुपयोग अनुसन्धान आयोगले चालिसेविरुद्ध ३ करोड ६८ लाख ४७ हजार ७६१ रुपैयाँ अवैध आर्जन गरेको आरोपसहित मुद्दा दायर गरेको थियो। आयोगको दाबी अनुसार उनी सार्वजनिक पदमा रहँदा आफ्नो जिम्मेवारीको दुरुपयोग गरी स्रोत नखुलेको सम्पत्ति आर्जन गरेका थिए।
चालिसेले बयानका क्रममा आफूमाथि लगाइएको आरोप झुटो भएको र कानुनअनुसार सम्पत्ति आर्जन गरेको दाबी गरेका छन्।
