गृह मन्त्रालयले नेपाल–चीन सम्बन्धलाई असर पार्ने किसिमको घटनामा छानबिन गरी दोषीमाथि आवश्यक कारबाही गर्न नेपाल प्रहरीलाई निर्देशन दिएको छ।
मोरङको मनमोहन टेक्निकल इन्टिच्यूटमा चिनियाँ राष्ट्रपति सी जिनपिङको ‘द गभर्नेन्स अफ चाइना’ नामक पुस्तक जलाएको विषयमा चीनले परराष्ट्र मन्त्रालयमार्फत ध्यानाकर्षण गराएको थियो।
उक्त घटनाको छानबिन र कारबाही गर्न काठमाडौँस्थित चिनियाँ दूतावासबाट प्राप्त कूटनीतिक पत्रसहित परराष्ट्र मन्त्रालयले गृह मन्त्रालयलाई पत्राचार गरेको थियो। गृह मन्त्रालयले पत्रको आधारमा आवश्यक कारबाहीका लागि प्रहरीलाई निर्देशन दिएको हो।
मोरङ प्रशासन र प्रहरीलाई दोषीलाई कानुनी दायरामा ल्याएर अनुसन्धान पूरा गर्न गृह मन्त्रालयले निर्देशन दिएको छ।
